ജയ്പൂർ: ഇച്ഛാശക്തി, ജ്ഞാനശക്തി, ക്രിയാശക്തി എന്നിവ സ്ത്രീകളിൽ സ്വാഭാവികമായും അന്തർലീനമാണെന്ന് രാഷ്ട്രസേവികാ സമിതി പ്രമുഖ് സഞ്ചാലിക വി. ശാന്തകുമാരി. രാഷ്ട്രത്തിന് വേണ്ടി ജീവിക്കുകയാണ് എല്ലാവരുടെയും കടമ. അഭിമാനകരമായ നമ്മുടെ ചരിത്രത്തെപ്പറ്റി എല്ലാ തലമുറകളും ബോധമുള്ളവരായിത്തീരണം. അതിൽ നിന്ന് ക്രിയാശക്തിയെ രൂപപ്പെടുത്തണം, ശാന്തകുമാരി പറഞ്ഞു. സംഗനേർ എസ്.എസ്. ജെയിൻ സുബോധ് വനിതാ അദ്ധ്യാപക പരിശീലന കോളേജ്, സംസ്‌കൃത മഹിള വിചാർ മഞ്ച് എന്നിവയുടെ ആഭിമുഖ്യത്തിൽ സംഘടിപ്പിച്ച മണികർണികസെമിനാറിൽ സംസാരിക്കുകയായിരുന്നു അവർ.
റാണി ലക്ഷ്മിഭായിയുടെ ജീവിതത്തിൽ നിന്ന് പ്രചോദനം ഉൾക്കൊള്ളാൻ ശാന്തകുമാരി ആഹ്വാനം ചെയ്തു: അച്ചടക്കത്തിന്റെയും മാതൃത്വത്തിന്റെയും സവിശേഷമായ സംയോജനമാണ് റാണി ലക്ഷ്മിഭായിയുടേത്. അദ്ധ്യാപനം, വൈദ്യശാസ്ത്രം, പഠനം എന്നിങ്ങനെ എല്ലാ മേഖലകളിലും വിശ്വസ്തതയുടെയും കടമയുടെയും പ്രതീകമായിരുന്നു ലക്ഷ്മിഭായി എന്ന് ശാന്തകുമാരി ചൂണ്ടിക്കാട്ടി.
സേവിക സമിതി സംഗനേർ മഹാനഗർ ശാരീരിക് പ്രമുഖ് സൗമ്യ പാണ്ഡെ, കോളജ് പ്രിൻസിപ്പൽ ഡോ. യദു ശർമ്മ, ഗായിക ലക്ഷ്മി ബാഗേൽ, സംസ്‌കൃത മഹിളാ വിചാർ മഞ്ച് കൺവീനർ ഡോ. ഷിപ്ര പരീഖ് എന്നിവർ സംസാരിച്ചു.
Discussion about this post