മുംബൈ: ധാരാവിയില്‍ ആദ്യമായി കൊവിഡ് സ്ഥിരീകരിച്ച് മരിച്ച 56കാരന് നിസാമുദ്ദീനില്‍ നടന്ന തബ്‌ലീഗ് മതസമ്മേളനം കഴിഞ്ഞ് മടങ്ങിയെത്തിയ മലയാളികളുമായി സമ്പര്‍ക്കം ഉണ്ടായിരുന്നതായി മുംബൈ പോലീസ്. അങ്ങനെയാകാം ഇയാള്‍ക്ക് വൈറസ് ബാധയുണ്ടായതെന്നാണ് പോലീസ് പറയുന്നത്. മതസമ്മേളനം കഴിഞ്ഞെത്തിയ പത്ത് പേര്‍ ഇയാളുടെ ഒഴിഞ്ഞുകിടക്കുന്ന വീട്ടില്‍ താമസിച്ചിരുന്നെന്നാണ് റിപ്പോര്‍ട്ടുകള്‍. ഇവരില്‍ നാല് പേര്‍ കേരളത്തിലേക്ക് മടങ്ങുന്നതിനു മുമ്പ് ഇദ്ദേഹത്തെ സന്ദര്‍ശിക്കുകയും ചെയ്തിരുന്നു. ഇവരുമായുള്ള സമ്പര്‍ക്കത്തില്‍ നിന്നാണ് ഇയാള്‍ക്ക് രോഗം പകര്‍ന്നതെന്നാണ് റിപ്പോര്‍ട്ടുകള്‍. മാര്‍ച്ച് 24നാണ് നാല് പേരടങ്ങുന്ന സംഘം കേരളത്തിലേക്ക് തിരിച്ചത്. പ്രഥമ ദൃഷ്ടിയില്‍ ഈ സന്ദര്‍ശകരില്‍ നിന്നാണ് ഇദ്ദേഹത്തിന് കൊവിഡ് ബാധിച്ചത്. അവരെ കണ്ടെത്താനും ഐസൊലേറ്റ് ചെയ്യാനും കേരള സര്‍ക്കാരിനോട് ഞങ്ങള്‍ ആവശ്യപ്പെട്ടിട്ടുണ്ടെന്നു ഷാഹു നഗര്‍ പോലീസ് സ്റ്റേഷനിലെ ഉദ്യോഗസ്ഥന്‍ പറഞ്ഞു. ധാരാവിയിലെ ഗാര്‍മെന്റ് യൂണിറ്റ് ഉടമയായ 56കാരന് ഏപ്രില്‍ ഒന്നിനാണ് മരിച്ചത്. മരിച്ചയാളുമായി ബന്ധം പുലര്‍ത്തിയിരുന്ന 15 പേരാണ് ഹൈറിസ്‌കിലുള്ളത്. ഏഷ്യയിലെ തന്നെ ഏറ്റവും വലിയ ചേരിയായി അറിയപ്പെടുന്ന ധാരാവിയില്‍ കൊറോണ സ്ഥിരീകരിച്ചതോടെ അധികൃതര്‍ അതീവ ജാഗ്രതയിലാണ്. ഇതുവരെ മൂന്ന് കൊവിഡ്-19 കേസുകളാണ് ധാരാവിയില്‍ നിന്ന് റിപ്പോര്‍ട്ട് ചെയ്തിരിക്കുന്നത്. അതേസമയം, രാജ്യത്ത് പുതിയതായി റിപ്പോര്‍ട്ട് ചെയ്യുന്ന കൊവിഡ് കേസുകളില്‍ 70 ശതമാനവും തബ്‌ലീഗുകാരുടെ സമ്മേളനത്തില്‍ പങ്കെടുത്തവരില്‍ നിന്നാണ്.
Discussion about this post