കൊല്ക്കത്ത: അധ്യാപകനിയമന അഴിമതിക്കേസില് എന്ഫോഴ്സ് അറസ്റ്റ് ചെയ്ത പശ്ചിമ ബംഗാള് മന്ത്രി പാര്ത്ഥ ചാറ്റര്ജിയുടെ 27.90 കോടി രൂപയും ആറ് കിലോ സ്വര്ണവും കൂടി പിടിച്ചെടുത്തു. പാര്ത്ഥയുടെ സുഹൃത്തും നടിയുമായ അര്പ്പിത മുഖര്ജിയുടെ രണ്ടാമത്തെ ഫ്ളാറ്റില് ഇ ഡി നടത്തിയ പരിശോധനയിലാണ് പണം കണ്ടെടുത്തത്. ഇതോടെ ഇവരുടെ പക്കലല് നിന്ന് പിടിച്ച തുകം നാല്പത് കോടി ആയി. നേരത്തെ അര്പ്പിതയുടെ വീട്ടില് നിന്ന് 21 കോടി രൂപ കൂട്ടിയിട്ട നിലയില് കണ്ടെടുത്തിരുന്നു.
പതിനൊന്ന് മണിക്കൂറാണ് പരിശോധന നടന്നത്. കൊല്ക്കത്തയിലെ ബെല്ഗാരിയ ടൗണ് ക്ലബിലുള്ള ഫ്ളാറ്റില് പരിശോധന നടത്തുന്നതിനിടെയാണ് ഷെല്ഫില് നിന്ന് പണക്കെട്ടുകള് കണ്ടെടുത്തത്. ബാങ്ക് ഉദ്യോഗസ്ഥരുടെയും കൗണ്ടിങ് മെഷീനുകളുടെയും സഹായത്തോടെ നോട്ടുകള് എണ്ണാന് മണിക്കൂറുകളെടുത്തു, വ്യാഴാഴ്ച പുലര്ച്ചെ 5.30 വരെ വോട്ടെണ്ണല് നീണ്ടു. നോട്ടെണ്ണിത്തീര്ക്കാന് നാല് കൗണ്ടിങ് മെഷീനുകള് ഉപയോഗിക്കേണ്ടിവന്നു. ആലിബാബയുടെ ഇരുമ്പുകൂട് പോലെയാണ് അര്പ്പിതയുടെ അലമാരകളെന്ന് ഇ ഡി ഉദ്യോഗസ്ഥര് പറഞ്ഞു.
പണവും ആഭരണങ്ങളും കൂടാതെ, ഭൂമിയുമായി ബന്ധപ്പെട്ട രേഖകളും ഇ ഡി ഉദ്യോഗസ്ഥര് കണ്ടെടുത്തിട്ടുണ്ട്. സ്വര്ണക്കട്ടികള്, വെള്ളി നാണയങ്ങള്, വസ്തുവകകള്, സിഡികള് എന്നിവയും പിടിച്ചെടുത്തു. ട്രങ്കുകളിലാക്കിയാണ് പിടിച്ചെടുത്ത സ്വര്ണവും വെള്ളിയും ഇ ഡി കൊണ്ടുപോയത്.
ഫ്ളാറ്റിന്റെ ഗേറ്റില് നോട്ടീസ് പതിച്ച് വീട് സീല് ചെയ്തു. എന്ഫോഴ്സ്മെന്റ് ഡയറക്ടറേറ്റിലെ അസിസ്റ്റന്റ് ഡയറക്ടര് വിപുല് ഹര്ഷിന്റെ നേതൃത്വത്തിലായിരുന്നു പരിശോധന.
അതേസമയം ബംഗാള് വിദ്യാഭ്യാസ മന്ത്രി മണിക് ഭട്ടാചാര്യയെ ഇ ഡി സംഘം പതിന്നാല് മണിക്കൂര് ചോദ്യം ചെയ്ത് വിട്ടയച്ചു. ഭട്ടാചാര്യയുടെ ജാദവ്പൂരിലെ വീട്ടില് നടന്ന പരിശോധനയില് നാല് സിഡികള് പിടിച്ചെടുത്തിരുന്നു. സര്ക്കാര് പ്രൈമറി സ്കൂളിലെ 269 നിയമനങ്ങള് സംബന്ധിച്ച വിവരങ്ങള് അടങ്ങിയതായിരുന്നു സിഡികളെന്ന് ഇ ഡി വെളിപ്പെടുത്തി.
