ബെംഗളൂരു: സുള്ള്യയിലെ യുവമോര്ച്ചാ നേതാവ് പ്രവീണ് നെട്ടാരുവിന്റെ കൊലപാതകം എന്ഐഎ. അന്വേഷിക്കും. കേസ് എന്ഐഎയ്ക്ക് കൈമാറാന് കര്ണാടക സര്ക്കാര് തീരുമാനിച്ചതായി മുഖ്യമന്ത്രി ബസവരാജ് ബൊമ്മെ അറിയിച്ചു. ഡിജിപി, ഐജിപി, മറ്റ് മുതിര്ന്ന ഉദ്യോഗസ്ഥര് എന്നിവരുമായി നടത്തിയ ചര്ച്ചയെ തുടര്ന്നാണ് തീരുമാനം.
പ്രവീണ് കൊലപാതകം സംഘടിത കുറ്റകൃത്യമാണെന്ന് മുഖ്യമന്ത്രി മാധ്യമപ്രവര്ത്തകരോട് പറഞ്ഞു. കുറ്റകൃത്യത്തിന്റെ ആസൂത്രണം രണ്ട് സംസ്ഥാനങ്ങളിലാതിനാലാണ് കേസ് എന്ഐഎയ്ക്ക് കൈമാറാന് തീരുമാനിച്ചതെന്നും അദ്ദേഹം കൂട്ടിച്ചേര്ത്തു.
കേരള-കര്ണാടക അതിര്ത്തിയില് സിസിടിവി ക്യാമറകള് സ്ഥാപിക്കാനും ചെക്ക് പോസ്റ്റില് കര്ശന നിരീക്ഷണം ഏര്പ്പെടുത്താനും ബൊമ്മൈ ഉദ്യോഗസ്ഥര്ക്ക് നിര്ദ്ദേശം നല്കി. ക്രമസമാധാന നില നിലനിര്ത്താന് കെഎസ്ആര്പി ബറ്റാലിയനെ ദക്ഷിണ കന്നഡയിലേക്ക് അയക്കും. അനിഷ്ട സംഭവങ്ങള് ഉണ്ടാകാതിരിക്കാന് രാത്രികാല പട്രോളിങ് ശക്തമാക്കാന് പോലീസിന് നിര്ദേശം നല്കിയിട്ടുണ്ടെന്നും അദ്ദേഹം പറഞ്ഞു.
അതേസമയം കേസില് ഒരാളെ കൂടി അറസ്റ്റ് ചെയ്തു. ബെല്ലാരെയില് ചിക്കന് സെന്റര് നടത്തുന്ന കാണിയൂര് സ്വദേശി സദ്ദാം എന്നയാളെയാണ് ഇന്നലെ പിടികൂടിയത്. ഇതിന് സമീപമാണ് പ്രവീണിന്റെ ചിക്കന് സെന്ററും പ്രവര്ത്തിച്ചിരുന്നത്. പ്രവീണ് കടയില് വരുന്നതും പോകുന്നതും എപ്പോഴാണെന്ന് കൊലയാളികള്ക്ക് സദ്ദാം പറഞ്ഞുകൊടുത്തുവെന്ന് പോലീസ് പറഞ്ഞു. പ്രതികളായ മുഹമ്മദ് ഷഫീക്കിനെയും സക്കീറിനെയും കേരളത്തിലെ കാസര്കോട് ജില്ലയില് നിന്ന് കര്ണാടക പോലീസ് നേരത്തെ അറസ്റ്റ് ചെയ്തിരുന്നു. കൂടുതല് അറസ്റ്റ് ഉടന് ഉണ്ടാകുമെന്നും ഉദ്യോഗസ്ഥര് അറിയിച്ചു.
ദക്ഷിണ കന്നഡയില് സംഘര്ഷങ്ങള് തുടരുന്ന സാഹചര്യത്തില് കൂടുതല് ഇടങ്ങളില് നിരോധനാജ്ഞ തുടരുകയാണ്. കൂടുതല് പോലീസിനെയും ഈ മേഖലയില് വിന്യസിച്ചിട്ടുണ്ട്. എഡിജിപി അടക്കമുള്ള ഉന്നത ഉദ്യോഗസ്ഥര് മംഗളൂരുവില് ക്യാമ്പ് ചെയ്യുന്നുണ്ട്. വാഹനങ്ങള് പരിശോധിച്ചതിനുശേഷമേ യാത്രയ്ക്ക് അനുവദിക്കൂ
സോഷ്യല് മീഡിയയില് ഉത്തരവാദിത്തത്തോടെ പെരുമാറണമെന്ന് പോലീസ് ജനങ്ങളോട് അഭ്യര്ത്ഥിച്ചു. കിംവദന്തികള് പ്രചരിപ്പിക്കരുതെന്നും അത്തരം പ്രചരണങ്ങളില് വിശ്വസിക്കരുതെന്നും വ്യാജ ഐഡികള് വഴി കെട്ടിച്ചമച്ച വിവരങ്ങള് പോസോഷ്യല് മീഡിയയില് കൈമാറരുതെന്നും പോലീസ് ഉദ്യോഗസ്ഥര് അറിയിച്ചു.
Discussion about this post