പ്രയാഗ്രാജ്(യുപി): സമഗ്രവും എല്ലാവര്ക്കും ബാധകവുമായ ജനസംഖ്യാ നയത്തിന് രൂപം നല്കേണ്ടത് അനിവാര്യമാണെന്ന് ആര്എസ്എസ് സര്കാര്യവാഹ് ദത്താത്രേയ ഹൊസബാളെ. രാജ്യത്തിന്റെ വിഭവങ്ങള് പരിമിതമാണ്. ഈ സാഹചര്യത്തില് രാജ്യത്ത് സംഭവിക്കുന്ന ജനസംഖ്യാവിസ്ഫോടനം ആശങ്കാജനകമാണ്. ഇക്കാര്യത്തില് രാജ്യത്ത് പൊതുബോധവല്ക്കരണവും ജാഗ്രതയും ആവശ്യമാണെന്ന് അദ്ദേഹം പറഞ്ഞു. ഇന്ന് സമാപിച്ച ആര്എസ്എസ് അഖില ഭാരതീയ കാര്യകാരി മണ്ഡലിന്റെ ഭാഗമായി പ്രയാഗ്രാജിലെ ഗൗഹാനിയ ജയ്പുരിയ സ്കൂള് കാമ്പസില് ചേര്ന്ന വാര്ത്താ സമ്മേളനത്തില് സംസാരിക്കുകയായിരുന്നു സര്കാര്യവാഹ്.
മതപരിവര്ത്തനം രാജ്യത്തെ ഹിന്ദുജനസംഖ്യ കുറയുന്നതിന് കാരണമായിട്ടുണ്ട്. ജനസംഖ്യയിലെ മതപരമായ അസന്തുലിതാവസ്ഥ പല രാജ്യങ്ങളുടെയും വിഭജനത്തിലേക്ക് നയിച്ചു. നമ്മുടെ രാജ്യവും വിഭജിക്കപ്പെട്ടത് ഇതേ കാരണം കൊണ്ടാണെന്ന് അദ്ദേഹം ചൂണ്ടിക്കാട്ടി.
കഴിഞ്ഞ നാലഞ്ച് പതിറ്റാണ്ടായി ജനസംഖ്യാനിയന്ത്രണത്തില് പുലര്ത്തിയ ഊന്നല് മൂലം ഓരോ കുടുംബത്തിന്റെയും ശരാശരി ജനസംഖ്യാവളര്ച്ച 3.4ല് നിന്ന് 1.9 ആയി കുറഞ്ഞു. ഇതുമൂലം യുവാക്കളുടെ എണ്ണം കുറയുകയും പ്രായമായവരുടെ എണ്ണം കൂടുകയും ചെയ്യുന്ന കാലംവരുമെന്നത് ആശങ്കയുണ്ടാക്കുന്നുവെന്ന് ഒരു ചോദ്യത്തിന് മറുപടിയായി അദ്ദേഹം പറഞ്ഞു.
സ്വത്വാഭിമാനം മൂലം രാജ്യത്തെ വനവാസിസമൂഹം ഹിന്ദുത്വബോധം ആര്ജിച്ചതായി അദ്ദേഹം ചൂണ്ടിക്കാട്ടി. വടക്കുകിഴക്കന് സംസ്ഥാനങ്ങളിലെ വനവാസി ഗോത്രസമൂഹം സംഘത്തിന്റെ ആദര്ശത്തെ വരവേല്ക്കുകയാണ്. ‘ഞങ്ങളും ഹിന്ദുക്കളാണ്’ എന്ന് അഭിമാനത്തോടെ അവര് പറയുന്നു. മേഘാലയയിലെയും ത്രിപുരയിലും ഗോത്രജനത സര്സംഘചാലക് ഡോ. മോഹന്ഭാഗവതിനെ അവരുടെ വിശേഷ അവസരങ്ങളില് പങ്കുകൊള്ളാന് ക്ഷണിച്ചത് അതിന്റെ അടയാളമാണെന്ന് സര്കാര്യവാഹ് പറഞ്ഞു. ആര്എസ്എസ് അഖില ഭാരതീയ പ്രചാര് പ്രമുഖ് സുനില് അംബേക്കറും വാര്ത്താ സമ്മേളനത്തില് പങ്കെടുത്തു.
Discussion about this post