ഹൈദരാബാദ്: ക്ലാസിക് സിനിമകളുടെ സംവിധായകന് കാശിനധുനി വിശ്വനാഥന് (കെ. വിശ്വനാഥ്) അന്ത്യയാത്രാമൊഴിയേകി ചലച്ചിത്ര ലോകം. സംവിധായകന് എസ്.എസ്. രാജമൗലി, സംഗീത സംവിധായകന് എം.എം. കീരവാണി, നടന് ചിരഞ്ജീവി തുടങ്ങി നിരവധി തെലുങ്ക് താരങ്ങള് അദ്ദേഹത്തിന്റെ സംസ്കാര ചടങ്ങില് അന്തിമോപചാരം അര്പ്പിക്കാനെത്തിച്ചേര്ന്നു.
അദ്ദേഹത്തിന് 92 വയസ്സായിരുന്നു. വാര്ധക്യ സഹജമായ അസുഖങ്ങളെ തുടര്ന്ന് ഹൈദരാബാദിലെ സ്വകാര്യ ആശുപത്രിയില് ചികിത്സയിലായിരുന്നു കെ. വിശ്വനാഥ്. ദാദാസാഹിബ് ഫാല്ക്കെ അവാര്ഡ് ജേതാവാണ്.
ഓഡിയോഗ്രാഫറായാണ് വിശ്വനാഥ് തന്റെ ഔദ്യോഗിക ജീവിതം ആരംഭിച്ചത്. സൗണ്ട് എഞ്ചിനീയറായി ഹ്രസ്വകാല സേവനത്തിന് ശേഷം സംവിധായകനായ അദുര്തി സുബ്ബ റാവുവിന്റെ അസിസ്റ്റന്റായി. 1951 ല് പാതാള ഭൈരവി എന്ന തെലുങ്ക് ചിത്രത്തിന്റെ അസിസ്റ്റന്റ് ഡയറക്ടറായിരുന്നു.
1965-ല് പുറത്തിറങ്ങിയ ആത്മ ഗൗരവം എന്ന ചിത്രത്തിലൂടെ വിശ്വനാഥ് സംവിധായകനായി അരങ്ങേറ്റം കുറിച്ചു. മലയാളത്തിലും തെലുങ്കിലുമടക്കം ഒട്ടുമിക്ക ഇന്ത്യന്ഭാഷകളിലും സംഗീതതരംഗം തീര്ത്ത ശങ്കരാഭരണം അദ്ദേഹത്തിന്റെ മാസ്റ്റര്പീസാണ്. സാഗരസംഗമം, സപ്തപദി, സ്വാതിമുത്യം, കംചോര് തുടങ്ങിയ ചിത്രങ്ങള് ജനപ്രിയങ്ങളാണ്. അഞ്ച് തവണ ദേശീയ അവാര്ഡ് നേടിയ അദ്ദേഹം 20 തവണ ആന്ധ്രാസര്ക്കാരിന്റെ നന്ദി പുരസ്കാരത്തിന് അര്ഹനായി. 1992ല് പദ്മശ്രീ ബഹുമതിയും അദ്ദേഹത്തെ തേടിയെത്തി.
Discussion about this post