ന്യൂദല്ഹി: കോടതി വിധി വന്ന് ദിവസങ്ങളായിട്ടും രാഹുല്, സൂറത്ത് കോടതി വിധിക്കെതിരെ അപ്പീല് നല്കാത്തത് ധാര്ഷ്ട്യം കൊണ്ടാണെന്ന് കേന്ദ്ര ആഭ്യന്തരമന്ത്രി അമിത് ഷാ. കോടതി ശിക്ഷിച്ചതിനെ തുടര്ന്ന് അയോഗ്യനാക്കപ്പെടുന്ന ആദ്യ ജനപ്രതിനിധിയല്ല രാഹുല് ഗാന്ധി. അതിനെ ഇത്രയ്ക്ക് സംഭവമാക്കേണ്ടതില്ല. സ്വകാര്യ ചടങ്ങില് പങ്കെടുത്ത് സംസാരിക്കുകയായിരുന്നു അദ്ദേഹം.
നിങ്ങള്ക്ക് എംപിയായി തുടരാന് താല്പര്യമുണ്ട്, പക്ഷേ കോടതിയില് പോകില്ല. ഇത്തരം അഹങ്കാരം എവിടെ നിന്നാണ് വരുന്നത്. തന്റെ ശിക്ഷാവിധിയില് സ്റ്റേ എടുക്കാന് അദ്ദേഹം അപ്പീല് നല്കിയിട്ടില്ല. ഈ മാന്യദേഹം അയോഗ്യനാക്കപ്പെട്ട ആദ്യത്തെ ആളൊന്നുമല്ല. വളരെ വലിയ സ്ഥാനങ്ങള് വഹിച്ചിട്ടുള്ളതും കൂടുതല് അനുഭവപരിചയമുള്ളതുമായ രാഷ്ട്രീയക്കാര്ക്ക് ഈ വ്യവസ്ഥ കാരണം അവരുടെ അംഗത്വം നഷ്ടപ്പെട്ടിട്ടുണ്ട്.
ലാലു പ്രസാദ് യാദവ്, ജെ. ജയലളിത തുടങ്ങി രാഹുല് ഗാന്ധിയെക്കാള് മികച്ച അനുഭവപരിചയമുള്ള നിരവധിപേര്ക്ക് നിയമസഭ, ലോക്സഭ അംഗത്വങ്ങള് നഷ്ടപ്പെട്ടിട്ടുണ്ടെന്നും ഷാ ചൂണ്ടിക്കാട്ടി. ഇപ്പോള് ഒരുപക്ഷേ അദ്ദേഹത്തിന് സഹായകമാകുമായിരുന്ന ഓര്ഡിനന്സ് മുമ്പ് വലിച്ചുകീറിയത് രാഹുല് തന്നെയല്ലെ എന്നും അമിത് ഷാ ചോദിച്ചു.
എന്നാല് രാഹുല് ഗാന്ധിയുടെ ഔദ്യോഗിക വസതി ഒഴിയാന് നോട്ടീസ് നല്കിയതുമായി ബന്ധപ്പെട്ട ചോദ്യത്തിന് അതില് തിടുക്കം കാണിച്ചിട്ടില്ല. അയോഗ്യനാക്കപ്പെട്ടാല് അവര്ക്ക് ലഭിക്കുന്ന വസതി ഒഴിയാന് ആവശ്യപ്പെടുന്നത് സ്വാഭാവിക പ്രക്രിയ ആണെന്നും അദ്ദേഹം ആഭ്യന്തര മന്ത്രി കൂട്ടിച്ചേര്ത്തു.
Discussion about this post