ന്യൂഡൽഹി: ലാൽ ബഹദൂർ ശാസ്ത്രി ജന്മദിനത്തിൽ ചരിത്രമുറങ്ങുന്ന സംവിധാൻ സദന്റെ (പഴയ പാർലിമെന്റ് മന്ദിരം) സെൻട്രൽ ഹാളിൽ സംസാരിക്കുക അതും ലളിതജീവിതവും ആദർശങ്ങളും കൊണ്ട് ഭാരതത്തെ നയിച്ച മുൻ പ്രധാനമന്ത്രി ലാൽ ബഹദൂർ ശാസ്ത്രിയെക്കുറിച്ച്, ആ അസുലഭ നിമിഷത്തിന് ദൈവത്തോട് നന്ദി പറയുകയാണ് തൃപ്പൂണിത്തറ സ്വദേശി പി അനഘ. കേൾവിക്കാരായി ലോകസഭാ സ്പീക്കർ ഓം ബിർള, കേന്ദ്ര മന്ത്രിമാരായ ധർമ്മേന്ദ്രപ്രധാൻ, അർജുൻ റാം മേഘ്വാൾ, പിന്നെ അച്ഛനും അമ്മയും സഹോദരിയും.
നിരവധി പ്രസംഗമത്സരങ്ങളിൽ ജേതാവായ അനഘയ്ക്ക് നെഹ്‌റു യുവകേന്ദ്ര നടത്തിയ പ്രസംഗമത്സരത്തിൽ ലഭിച്ച ഒന്നാം സ്ഥാനമാണ് പാർലമെന്റിൽ പ്രസംഗിക്കാനുള്ള അവസരമൊരുക്കിയത്. സെറ്റ് മുണ്ടും ധരിച്ച് കേരളീയ വേഷത്തിലാണ് അനഘ എത്തിയത്. കുസാറ്റിലെ എൽഎൽബി വിദ്യാർഥിനി അല്പനിമിഷ നേരത്തേക്കെങ്കിലും ഭാരതം മുഴുവൻ കാതോർക്കുന്ന ഒരു പ്രഭാഷകയായി. വിവിധ സംസ്ഥാനങ്ങളിൽ നിന്ന് പ്രസംഗം മത്സരത്തിൽ വിജയികളായ 28 പേരിൽ ഏഴുപേർക്ക് മാത്രമാണ് പ്രസംഗിക്കാൻ അവസരം ലഭിച്ചത്. അവരിൽ ഒരാളായിരുന്നു കേരളത്തിനെ പ്രതിനിധീകരിച്ച് എത്തിയ പി. അനഘ.
പാർലമെന്റിലടക്കം നടക്കുന്ന പ്രമുഖരുടെ പ്രസംഗങ്ങൾ സസൂക്ഷ്മം കേൾക്കാറുണ്ടെങ്കിലും ഏറ്റവും കൂടുതൽ ആകർഷിച്ചത് കേന്ദ്രമന്ത്രി നിർമലാ സീതാരാമന്റെ പ്രസംഗമാണെന്ന് അനഘ പറയുന്നു.
നിവേദിത വനിതാ സമാജം സംഘടിപ്പിച്ച സംസ്ഥാനതല പ്രബന്ധമത്സരത്തിൽ ഒന്നാം സ്ഥാനം, കൊണാർക്ക് പബ്ലിഷേഴ്സ് ദേശീയതലത്തിൽ നടത്തിയ മത്സരത്തിൽ രണ്ടാം സ്ഥാനം ഉൾപ്പെടെ ഒട്ടേറെ സമ്മാനങ്ങൾ നേടിയിട്ടുണ്ട് അനഘ. തൃപ്പൂണിത്തുറ പുർണത്രയീശ ക്ഷേത്രത്തിനു സമീപം കോട്ടയ്ക്കകം ശിൽപ്പിസൗഭദ്രം അപ്പാർട്മെന്റിൽ മോഹൻകുമാർ- വിജയ ദമ്പതികളുടെ മകളാണ് അനഘ. ഡോ. അമൃത സഹോദരിയാണ്.
Discussion about this post