ബംഗളൂരു: രാഷ്ട്രത്തിൻ്റെ ഐക്യവും അഖണ്ഡതയും നിലനിർത്തുന്നതിനും ദേശീയ ഐക്യം സാധ്യമാക്കുന്നതിനുമുള്ള ഐതിഹാസികമായ മുന്നേറ്റമാണ് ആർഎസ്എസ് സാധ്യമാക്കിയതെന്ന് സർകാര്യവാഹ് ദത്താത്രേയ ഹൊസബാളെ പ്രതിനിധി സഭയിൽ അവതരിപ്പിച്ച പ്രവർത്തന റിപ്പോർട്ട് വ്യക്തമാക്കുന്നു.. ചൈന, പാക്കിസ്ഥാൻ എന്നീ അയൽ രാജ്യങ്ങളുമായി ചേർന്നുനിൽക്കുന്ന അതിർത്തി സംസ്ഥാനങ്ങളിലെ വെല്ലുവിളികൾ അതിജീവിക്കുന്നതിന് വിപുലമായ ആസൂത്രണമാണ് ആവിഷ്കരിച്ചിരിക്കുന്നത്. ചൈന, പാക് അതിർത്തി പങ്കിടുന്ന ജമ്മു കാശ്മീരിൽ സംഘടനാ വളർച്ചയ്ക്ക് വിപുലമായപദ്ധതി ആവിഷ്കരിച്ചു. 33 വിഷയങ്ങളെ ആസ്പദമാക്കി 689 ഗ്രാമങ്ങളിൽ വിശദമായ സർവേ നടത്തിക്കൊണ്ടായിരുന്നു പ്രവർത്തനം ആരംഭിച്ചത്. അത്തരം ഗ്രാമങ്ങളിലെ സാമൂഹ്യ സാമ്പത്തികസുരക്ഷ വിഷയങ്ങളായിരുന്നു സർവ്വേയ്ക്ക് വിധേയമാക്കിയത്. സർകാര്യവാഹ് ദത്താത്രേയ ഹൊസബാളെ പങ്കെടുത്ത യോഗത്തിൽ അതിർത്തി ഗ്രാമങ്ങളിലെ സ്ഥിതിഗതികളെക്കുറിച്ച് വിശദമായ പഠനം അവതരിപ്പിച്ചു. ജില്ലാതലത്തിലെ റിപ്പോർട്ടുകൾ അവതരിപ്പിച്ച് സംഘടനാ പ്രവർത്തനം ശക്തമാക്കുന്നതിന് പദ്ധതികൾ ആവിഷ്കരിച്ചു. 2025 വിജയദശമിക്ക് മുമ്പ് ഇത്തരം മേഖലകളിൽ പ്രവർത്തനം ശക്തമാക്കുന്നതിന് വിപുലമായ പദ്ധതികൾ തയ്യാറാക്കി.
ജമ്മു കാശ്മീരിലെ സംഘടനാ പ്രവർത്തനം ശക്തമാക്കുന്നതിന് ഒരു കാര്യകർത്താവ് ഒരു ശാഖ എന്ന പദ്ധതിയിലൂടെ സംസ്ഥാനത്ത് 557 ശാഖകളുള്ളതിൽ 400 ശാഖകളിലെ കാര്യകർത്താക്കളെ പങ്കെടുപ്പിച്ച് യോഗങ്ങൾ നടന്നു. ദക്ഷിണ ആസാമിൽ 37 താലൂക്കുകളിലും 9 നഗരങ്ങളിലും പൂർണ ഗണവേഷധാരികളായ സ്വയം സേവകരുടെ പഥസഞ്ചലനങ്ങൾ നടന്നു. ഇവിടെ 323 മണ്ഡലങ്ങളിൽ നിന്ന് 257 മണ്ഡലങ്ങളിലെ കാര്യകർത്താക്കൾ പങ്കെടുത്ത യോഗങ്ങൾ നടന്നു. ഉത്തരബംഗാളിൽ നേതാജി ജന്മദിനത്തോടനുബന്ധിച്ച് 103 കേന്ദ്രങ്ങളിൽ പഥസഞ്ചലനങ്ങൾ നടന്നു. അസം ബംഗാൾ, ത്രിപുര വടക്കുകിഴക്കൻ മേഖലകളിലെ വിവിധ സംസ്ഥാനങ്ങളിൽ പ്രവർത്തനം വിപുലമാക്കുന്നതിനുള്ള പദ്ധതികൾ ആവിഷ്കരിച്ചിട്ടണ്ടെന്ന് ഇന്നലെ പ്രതിനിധി സഭയിൽ അവതരിപ്പിച്ച 76 പേജ് റിപ്പോർട്ടിൽ വ്യക്തമാക്കുന്നു.
നാടോടികളായി അലഞ്ഞുനടക്കുന്ന സമൂഹങ്ങൾ മുതൽ വൻ നഗരങ്ങളിലെ പ്രബുദ്ധസമൂഹം വരെ എല്ലാതലങ്ങളിലെയും ജനസമൂഹങ്ങൾക്കിടയിൽ ദേശീയ ആശയം വ്യാപിപ്പിക്കുന്നതിനുള്ള പ്രവർത്തനങ്ങൾക്ക് പ്രത്യേകം പ്രത്യേകം ചുമതലക്കാരെയും വിഭാഗങളെയും ചുമതലപ്പെടുത്തിയിട്ടുണ്ട്. ദേശീയ ഐക്യം തകർക്കുന്നതിന് ജാതി, ഭാഷ, പ്രാദേശിക വിഷയങ്ങൾ ഉന്നയിച്ച് വിഘടനവാദ ശക്തികൾ തലപൊക്കുന്നത് കരുതിയിരിക്കണമെന്ന് പ്രവർത്തന റിപ്പോർട്ട് മുന്നറിയിപ്പ് നൽകുന്നു.
