ഡെറാഡൂണ്‍(ഉത്തരാഖണ്ഡ്): എബിവിപി 71-ാം ദേശീയ സമ്മേളനത്തിന് തുടക്കമായി. യുവാക്കള്‍ ഭാരതത്തിന്റെ ഭാവി രചിക്കുകയാണെന്ന് സമ്മേളനം ഉദ്ഘാടനം ചെയ്ത് ഐഎസ്ആര്‍ഒ മുന്‍ ചെയര്‍മാന്‍ ഡോ. എസ്. സോമനാഥ് പറഞ്ഞു.
യുവാക്കളുടെ ദൃഢനിശ്ചയമാണ് ഒരു രാഷ്ട്രത്തിന്റെ സ്വഭാവത്തെ രൂപപ്പെടുത്തുന്നതും ഉയര്‍ച്ച സാധ്യമാക്കുന്നതും. ശാസ്ത്രം, ആത്മീയത, അറിവ്, മൂല്യങ്ങള്‍, സേവനം എന്നിവയുടെ അടിത്തറയില്‍ അധിഷ്ഠിതമാണ് ഭാരതം. ചന്ദ്രയാന്‍ മൂന്നിലൂടെ ചന്ദ്രന്റെ ദക്ഷിണധ്രുവത്തില്‍ എത്തുന്ന ആദ്യത്തെ രാഷ്‌ട്രമായി ഭാരതം. അത്തരം നിരവധി ദൗത്യങ്ങളിലൂടെ നാം ലോകത്തിന് വഴികാണിക്കുന്നു. യുവാക്കള്‍ വര്‍ത്തമാനകാലത്തിന്റെ ദീപവാഹകര്‍ മാത്രമല്ല, ഭാവിയുടെ നെടുംതൂണുമാണ്. ഭാരത ജനസംഖ്യയുടെ 25ശതമാനത്തിലധികം യുവാക്കളാണ്, ഇത് നമുക്ക് ലഭിച്ച അനുഗ്രഹമാണ്. ഭാരതം ലോകത്തിന് നേര്‍വഴികാട്ടുമ്പോള്‍ അതില്‍ മുഖ്യപങ്ക് വഹിക്കാനുള്ളത് യുവാക്കള്‍ക്കാണെന്നും എസ്. സോമനാഥ് പറഞ്ഞു.
ഭാരതത്തിന്റെ ദേശീയ താല്പര്യങ്ങള്‍ സംരക്ഷിച്ചുകൊണ്ട് എന്നും മാര്‍ഗനിര്‍ദേശ ശക്തിയായ പ്രസ്ഥാനമാണ് എബിവിപിയെന്ന് സോമനാഥ് പറഞ്ഞു. യഥാര്‍ത്ഥ നേതൃത്വം സേവനത്തില്‍ വേരൂന്നിയതാണെന്ന് എബിവിപി തെളിയിച്ചിട്ടുണ്ട്, അദ്ദേഹം കൂട്ടിച്ചേര്‍ത്തു.
പരേഡ് ഗ്രൗണ്ടില്‍ പ്രത്യേകം സജ്ജീകരിച്ച ഭഗവാന്‍ ബിര്‍സ മുണ്ട നഗറിലെ ജനറല്‍ ബിപിന്‍ റാവത്ത് ഓഡിറ്റോറിയത്തില്‍ ചേര്‍ന്ന ഉദ്ഘാടന സമ്മേളനത്തില്‍ ദേശീയ പ്രസിഡന്റ് പ്രൊഫ. രഘുരാജ് കിഷോര്‍ തിവാരി അധ്യക്ഷനായി. ജനറല്‍ സെക്രട്ടറി ഡോ. വീരേന്ദ്രസിങ് സോളങ്കി, സംഘടനാ സെക്രട്ടറി ആശിഷ് ചൗഹാന്‍, സെക്രട്ടറി ക്ഷമ ശര്‍മ്മ, സ്വാഗതസംഘം ചെയര്‍മാന്‍ ഡോ. കമല്‍ ഘന്‍ശാല, ജനറല്‍ സെക്രട്ടറി രമേശ് ഗഡിയ, എബിവിപി ഉത്തരാഖണ്ഡ് സംസ്ഥാന പ്രസിഡന്റ് ഡോ. ജെ.പി. ഭട്ട്, സംസ്ഥാന സെക്രട്ടറി ഋഷഭ് റാവത്ത് എന്നിവരും പങ്കെടുത്തു.
Discussion about this post