ഗോവ ചലച്ചിത്രോത്സവ വേദിയിൽ കേന്ദ്ര സർക്കാറിന് നന്ദി പറഞ്ഞ് രജനീകാന്ത്; വീണ്ടും നടനായിത്തന്നെ ജനിക്കാനാണ് ആഗ്രഹമെന്നും സൂപ്പർ സ്റ്റാർ

പനജി : അന്താരാഷ്ട്ര ചലച്ചിത്ര മേളയുടെ സമാപനസമ്മേളനം സൂപ്പർ സ്റ്റാർ രജനീകാന്തിന് ഒരുക്കിയ ആദരം കൊണ്ട് ശ്രദ്ധേയമായി. ഗോവ മുഖ്യമന്ത്രി ഡോ: പ്രമോദ് സാവന്താണ് 50 വർഷത്തെ അഭിനയ ജീവിതം പൂർത്തിയാക്കിയ സൂപ്പർ സ്റ്റാർ രജനികാന്തിനെ ആദരിച്ചത് . ആദരത്തിന് രജനീകാന്ത് കേന്ദ്ര സർക്കാറിന് നന്ദി പറഞ്ഞു “ഏറെ വിനയത്തോടെയും നന്ദിയോടെയുമാണ് ഞാനിവിടെ നിൽക്കുന്നത്. എൻ്റെ 50 വർഷത്തെ സിനിമാപ്രവർത്തനത്തെ ആദരിച്ചതിന് കേന്ദ്ര സർക്കാറിന് നന്ദി. പിന്നോട്ട് നോക്കുമ്പോൾ ഞാൻ പത്തോ പതിനഞ്ചോ വർഷം മാത്രം ജോലി ചെയ്തെന്നേ തോന്നുന്നുള്ളൂ. കാരണം സിനിമയും അഭിനയവും എനിക്ക് അത്രമേൽ പ്രിയപ്പെട്ടതാണ്. അത് കൊണ്ട് തന്നെ,100 വർഷത്തിന് ശേഷവും ഒരു അഭിനേതാവായി – രജനീകാന്തായി ജനിക്കാനാണ് എനിക്ക് ആഗ്രഹം”.

അതോടൊപ്പം പ്രേക്ഷകർ നൽകുന്ന അകമഴിഞ്ഞ പിന്തുണയ്ക്കും സ്നേഹത്തിനും നന്ദിയുണ്ടെന്നും 74 കാരനായ സൂപ്പർ സ്റ്റാർ പറഞ്ഞു.കുടുംബാംഗങ്ങൾക്കൊപ്പമാണ് രജനീകാന്ത് ഗോവ അന്താരാഷ്ട്ര ചലച്ചിത്ര മേളയുടെ സമാപന ചടങ്ങിൽ ആദരവ് ഏറ്റുവാങ്ങാനെത്തിയത്.