തിരുവനന്തപുരം: ഭാരത് ജോഡോ യാത്രയ്ക്കിടെ ഗാന്ധിയന്മാരെ അപമാനിച്ചത് വേദനാജനകമെന്ന് പി ഗോപിനാഥൻ നായരുടെ ഭാര്യ സരസ്വതിയമ്മ. ഏറെ നേരം കാത്തിരുന്നിട്ടും രാഹുൽ ഗാന്ധി വരാതിരുന്നത്. സങ്കടമുണ്ടാക്കിയെന്നും അവർ പറഞ്ഞു.
ഗാന്ധിയന്മാരായ പി ഗോപിനാഥൻ നായരുടെയും കെ ഇ മാമന്റെയും സ്മൃതിമണ്ഡപം നിംസ് ആശുപത്രിയിൽ സ്ഥാപിച്ചിരുന്നു. ഇതിന്റെ അനാച്ഛാദനത്തിന് രാഹുൽ എത്തുമെന്ന് അറിയിച്ചാണ് ഇരുവരുടെയും കുടുംബാംഗങ്ങളെ ആശുപത്രിയിൽ എത്തിച്ചത്. ഗാന്ധിയന്മാരുടെ ഓർമയ്ക്കായി വൃക്ഷ തൈ നടുമെന്നും അറിയിച്ചിരുന്നു. എൺപത് കഴിഞ്ഞ സരസ്വതിയമ്മയടക്കമുള്ളവർ രണ്ട് മണിക്കൂറിലധികം കാത്തിരുന്നു. ആശുപത്രിയുടെ വാതിൽക്കലൂടെ കടന്നുപോയിട്ടും തങ്ങളെ കാണാൻ രാഹുൽ തയ്യാറായില്ലെന്ന് സരസ്വതിയമ്മ പറഞ്ഞു.
