കൊച്ചി: കുഫോസ് വിസി നിയമനം റദ്ദാക്കി ഹൈക്കോടതി. യുജിസി ചട്ടങ്ങള്ക്ക് വിരുദ്ധമായാണ് നിയമനം എന്ന ഹര്ജിക്കാരുടെ വാദം അംഗീകരിച്ചു കൊണ്ടാണ് കോടതി വിധി. ഡോ. കെ റിജി ജോണിന്റെ നിയമനമാണ് റദ്ദാക്കിയിരിക്കുന്നത്. യിജിസി ചട്ടപ്രകാരം പുതിയ സെര്ച്ച് കമ്മിറ്റിയെ രൂപികരിക്കാനും ഹൈക്കോടതി നിര്ദേശിച്ചു.
10 വര്ഷത്തെ പ്രവര്ത്തി പരിചയമില്ലെന്ന വാദം കോടതി അംഗീകരിക്കുകയായിരുന്നു. സാങ്കേതിക സര്വകലാശാല സുപ്രീം കോടതി വിധി കൂടി പരിഗണിച്ചാണ് ഹൈക്കോടതി വിധി. സര്ക്കാരിന് ഏറ്റ വലിയ തിരിച്ചടിയാണ് ഇത്. ഗവര്ണര്- സര്ക്കാര് പോരിനിടയില് ഗവര്ണറുടെ വാദം ശരിവെയ്ക്കുന്ന വിധിയാണ് ഹൈക്കോടതിയുടേത്.
ഹൈക്കോടതി ഡിവിഷന് ബെഞ്ചാണ് വിധി പ്രഖ്യാപിച്ചത്. വിസി നിയമനത്തിനുള്ള അന്തിമപട്ടികയില് ഉള്പ്പെട്ട ഡോ. കെ കെ വിജയന്, ഡോ. സദാശിവന് എന്നിവരാണ് വിസി നിയമനത്തിനെതിരെ ഹൈക്കോടതിയെ സമീപിച്ചത്. ഷോര്ട്ട് ലിസ്റ്റില് നാലാമനായിരുന്നു വിജയന്. ലിസ്റ്റില് ഒമ്പതാം സ്ഥാനത്തായിരുന്നു ഡോ റിജി ജോണ്. ഒമ്പതംഗ പാനലില് നിന്നും സെര്ച്ച് കമ്മിറ്റി വിസി നിയമനത്തിന് ഗവര്ണര്ക്ക് ഡോ. റിജി ജോണിന്റെ പേര് മാത്രമാണ് ശുപാര്ശ ചെയ്തിരുന്നത്.
ഇതോടെ വിസിയെ നിയമിക്കുന്നതിന് ഗവര്ണര്ക്ക് മുന്നില് ചോയ്സ് ഉണ്ടായിരുന്നില്ലെന്ന ഹര്ജിക്കാരുടെ വാദം ഹൈക്കോടതി അംഗീകരിച്ചു. ഇത് യുജിസി ചട്ടപ്രകാരം തെറ്റാണെന്നും കോടതി വിലയിരുത്തി. 2021 ജനുവരി 23 നാണ് ഡോ. റിജി ജോണിനെ ഫിഷറീസ് സര്വകലാശാല വി.സിയായി നിയമിച്ച് ഗവര്ണര് ഉത്തരവിറക്കിയത്.
യുജിസി മാനദണ്ഡങ്ങള് അനുസരിച്ച് ഒരു സര്വകലാശാലയില് പ്രൊഫസറായി10 വര്ഷത്തെ പ്രവൃത്തി പരിചയം വേണമെന്നിരിക്കെ തമിഴ്നാട് ഫിഷറീസ് സര്വകലാശാലയില് നിന്ന് കുഫോസിലേക്ക് ഡീന് ആയി എത്തിയ ഡോ. റിജി പിഎച്ച്ഡി ചെയ്യാന് പോയ മൂന്നു വര്ഷം കൂടി പ്രവൃത്തി പരിചയത്തിലുള്പ്പെടുത്തിയാണ് അപേക്ഷ നല്കിയതെന്ന് ഹര്ജിക്കാര് ആരോപിച്ചിരുന്നു.
സെര്ച്ച് കമ്മിറ്റിയില് അക്കാദമിക് യോഗ്യതയില്ലാത്തവരുണ്ടായിരുന്നുവെന്നും ഹര്ജിക്കാര് ആരോപിക്കുന്നു. റിജി ജോണിനെ നിര്ദ്ദേശിച്ച സേര്ച്ച് കമ്മിറ്റിയില് അക്കാദമിക് യോഗ്യതയില്ലാത്തവരും , ഒരു പാനലിന് പകരം ഒറ്റപ്പേര് മാത്രം നിര്ദ്ദേശിച്ചത് ചട്ടവിരുദ്ധമാണെന്നും ഹര്ജിക്കാര് ആരോപിക്കുന്നുണ്ട് . എന്നാല് കാര്ഷിക വിദ്യാഭ്യാസം സ്റ്റേറ്റ് ലിസ്റ്റിലുള്ളതായതിനാല് യു.ജി.സി മാനദണ്ഡങ്ങള് കുഫോസ് വിസി നിയമനത്തിന് ബാധകമല്ലെന്ന സര്ക്കാര് വീദം കൊടതി തള്ളുകയായിരുന്നു.
Discussion about this post