കൊച്ചി: ശബരിമലയിൽ രണ്ട് തരം തീർത്ഥാടകരെ സൃഷ്ടിക്കാൻ പാടില്ലെന്ന് ഹൈക്കോടതി വിധി. ശബരിമലയിലേക്ക് ഹെലികോപ്ടർ സർവ്വീസോ, വിഐപി ദർശനമോ വാഗ്ദാനം ചെയ്യാൻ പാടില്ലെന്നും ഹൈക്കോടതി നിർദേശിച്ചു.
ഒരാളും ഇത്തരം വാഗ്ദാനങ്ങൾ നൽകരുതെന്നും സന്നിധാനത്ത് ആർക്കും പ്രത്യേക പരിഗണന നൽകാൻ പാടില്ലെന്നും ഹൈക്കോടതി ഉത്തരവിട്ടു. നിലക്കൽ എത്തിയാൽ പിന്നെ എല്ലാവരും സാധാരണ ഭക്തരാണെന്നും ഹൈക്കോടതി വ്യക്തമാക്കി.
സ്വകാര്യ കമ്പനി ഹെലികോപ്റ്ററടക്കം വിഐപി ദർശനം വാഗ്ദാനം ചെയ്ത സംഭവത്തിൽ ഇടപെട്ട് സ്വമേധയാ എടുത്ത കേസിലാണ് ഈ വിധി. എൻഹാൻസ് എവിയേഷൻ കമ്പനിയുടെ ഒരു പരസ്യമായിരുന്നു വിവാദം സൃഷ്ടിച്ചത്. ശബരിമല തീർത്ഥാടകർക്ക് വിമാന സർവ്വീസ് വാഗ്ദാനം ചെയ്തു കൊണ്ടായിരുന്നു വെബ്സൈറ്റിൽ ഈ കമ്പനി പരസ്യം നൽകിയത്. കൊച്ചിയിൽ നിന്നും നിലയ്ക്കലിലേക്കാണ് കമ്പനി വിമാന സർവ്വീസ് വാഗ്ദാനം ചെയ്തത്. ഹെലികോപ്റ്ററിൽ നിലക്കലിൽ എത്തിക്കുന്ന ഭക്തരെ ഡോളിയിൽ സന്നിധാനത്തേക്ക് കൊണ്ടു പോകുമെന്നും ദർശനത്തിന് ശേഷം വീണ്ടും ഹെലികോപ്റ്ററിൽ കൊച്ചിയിലേക്കെത്തിക്കും എന്നുമായിരുന്നു കമ്പനിയുടെ വാഗ്ദാനം. ഈ പരസ്യം സംബന്ധിച്ച് ജില്ലാ പൊലീസ് മേധാവിയോടും പത്തനംതിട്ട ജില്ലാ കളക്ടറോടും കോടതി റിപ്പോർട്ട് തേടിയിട്ടുണ്ട്.
Discussion about this post