കണ്ണവം: മൂന്ന് മാസക്കാലമായി വിദ്യാലയത്തില് ക്രിയാ ഗവേഷണ പ്രവര്ത്തനങ്ങളില് ഏര്പ്പെട്ടുകൊണ്ടിരിക്കുകയാണ് കണ്ണവം ട്രൈബല് യുപി സ്കൂളിലെ അധ്യാപകര്. അധ്യാപകര് നേരിടുന്ന പ്രശ്നങ്ങള്ക്ക് അടിസ്ഥാനമായ കാരണങ്ങളെ ഗവേഷകന്റെ വീക്ഷണഗതിയോടെ ശാസ്ത്രീയമായി ശേഖരിച്ച് അപഗ്രഥിച്ച് വിലയിരുത്തി നിഗമനങ്ങളിലെത്തുകയും അപ്പോള് പരിഹാര പ്രവര്ത്തനങ്ങള് കണ്ടെത്തി നടപ്പിലാക്കുകയും ചെയ്യുന്ന രീതിയാണ് ക്രിയാ ഗവേഷണം. പഠനത്തിനും ബോധനത്തിനും പുതുവഴികള് തേടേണ്ടവരാണ് അധ്യാപകര് എന്നതാണ് ഇത്തരം പുതിയ ആശയത്തിന് പിന്നില്.
ക്ലാസ് മുറിയില് അറിവ് നിര്മാണ പ്രക്രിയയില് കുട്ടികള് നേരിടേണ്ടി വരുന്ന പ്രതിസന്ധികള് ലഘൂകരിക്കാനുതകുന്ന പ്രവര്ത്തനങ്ങള് കണ്ടെത്തുക എന്ന ലക്ഷ്യത്തോടെ പദ്ധതിയുടെ ഭാഗമായാണ് ട്രൈബല് യുപി സ്കൂളില് ക്രിയാ ഗവേഷണ സെമിനാര് നടത്തിയത്.
കൂത്തുപറമ്പ് ബ്ലോക്ക് പഞ്ചായത്ത് മെമ്പര് ഒ. ഗംഗാധരന് ഉദ്ഘാടനം ചെയ്തു. പ്രധാനാധ്യാപകന് എ.പി. രാജേഷ്, കൂത്തുപറമ്പ് ബിപിസി എന്. സതീന്ദ്രന്, എസ്എംസി ചെയര്മാന് വി. രതീശന്, പിടിഎ പ്രസിഡന്റ് എ. സുനില്കുമാര്, മദര് പിടിഎ പ്രസിഡന്റ് സി.പി. സന്ധ്യ, എസ്എസ്ജി ചെയര്മാന് സി.പി. രാഘവന്, സൗമ്യേന്ദ്രന് കണ്ണംവെള്ളി എന്നിവര് സംസാരിച്ചു. മുഴുവന് അധ്യാപകരും പ്രബന്ധങ്ങള് അവതരിപ്പിച്ചു.
