തിരുവനന്തപുരം: ഇടുക്കി ജില്ലയിലെ (പശ്ചിമഘട്ടം) മൂന്നാർ പ്രദേശത്തെ ഭൂമിയുടെ ചെരിവും, സമുദ്രനിരപ്പിൽ നിന്നുള്ള ഉയരവും, ഭൂചലന-ഉരുൽ പൊട്ടൽ സാധ്യതകളും , ഇക്കോളജിക്കൽ പ്രാധാന്യവും, വനംവന്യജീവി നിയമങ്ങളും കണക്കിലെടുക്കാതെ അനധികൃതമായി നിർമിച്ച കെട്ടിടങ്ങൾക്കെതിരെ ബഹുമാനപ്പെട്ട ഹൈകോടതി ഇടപെട്ടു മൂന്നാർ മേഖലയിലെ ഭൂമി പ്രശ്നം ശാശ്വതമായി പരിഹരിക്കണമെന്നും അവശ്യമെങ്കിൽ കെട്ടിടനിർമാണ നിരോധനം വരെ ആലോചിക്കാവുന്നതാണെന്നും കേരള സർക്കാരിന് നിർദേശം നൽകിയ സാഹചര്യത്തിൽ ഇത് മറികടക്കാനായി 2023 സെപ്റ്റംബർ 14ന് കേരള നിയമസഭ ഐക്യകണ്ഠമായി കേരള സർക്കാർഭൂമി പതിച്ച് കൊടുക്കൽ ഭേദഗതി ബിൽ-2023 പാസ്സാക്കി. ഒരുഭേദഗതി പ്രകാരം കഴിഞ്ഞ 50 വർഷമായി ഹൈറേഞ്ച്മേഖലയിൽ പട്ടയ / സർക്കാർ ഭൂമികളിൽ നിയമലഘനം നടത്തി കെട്ടിപ്പൊക്കിയ നിർമിതികളെ നിയമവിധേയമാക്കാനുള്ള ചുമതല സർക്കാരിൽ നിക്ഷിപ്തമാക്കുന്നു. മറ്റൊരു ഭേദഗതി പ്രകരം ഭൂമിയില്ലാത്തവർക്ക് കൃഷിക്കും വീട്വക്കുന്നതിനും വേണ്ടി മാത്രം നൽകിയ പട്ടയം വഴി ഹൈറേഞ്ചിലെ പരിസ്ഥിതി ദുർബല പട്ടയ ഭൂമിയിൽ നിന്നും പാറപൊട്ടിക്കാനും റിസോർട്ട് നിർമ്മിക്കാനും, ഇക്കോടൂറിസത്തിന് കോർപ്പറേറ്റ് മഫിയക്ക് വിൽക്കാനും പട്ടയ ഉടമക്ക് സാധിക്കും. ഇത് ഹൈറേഞ്ച് ഭൂപ്രകൃതിയെയും, വനം വന്യമൃഗ ആവാസ വ്യവസ്ഥയെയും, ഇക്കോളജിയെയും പക്ഷിമഘട്ടത്തെ തന്നെ തകർക്കുന്ന തലത്തിലെത്തിക്കും, മനുഷ്യമൃഗ സംഘർഷം വർധിപ്പിക്കും, തിരിച്ചെടുക്കാൻ കഴിയാത്ത വിധം ഭൂമിരൂപ മാറ്റം വരുന്ന സ്ഥിതിയിലാകും.
2007 ൽ അന്നത്തെ സർക്കാർ നിയമലെഘനത്തിന്റെ പേരിൽ പൊളിച്ചു മാറ്റിയ കെട്ടിടങ്ങൾക്ക് നഷ്ടപരിഹാരം സർക്കാർ നൽകേണ്ട അവസ്ഥയിലെത്തിക്കും. ഭരണ പ്രതിപക്ഷ കക്ഷികളുടെ വോട്ട് ബാങ്ക് രാഷ്ട്രീയം ഇതിൽ നിന്നും വ്യക്തമാണ്. ഈ സാഹചര്യത്തിൽ പുതിയ 2023 ലെ കേരള സർക്കാർ ഭൂമി പതിച്ചു കൊടുക്കൽ ഭേദഗതി ബിൽ ഗവർണർ ഒപ്പ് വെക്കരുതെന്നു ഭാരതീയ വിചാര കേന്ദ്രം സംസ്ഥാന സമിതി പ്രമേയത്തിലൂടെ ആവശ്യപ്പെടുന്നു. ഡോ. സി.എം. ജോയ് അവതരിപ്പിച്ച പ്രമേയത്തിൽ നടന്ന ചർച്ചയിൽ ഡയറക്ടർ ആർ. സഞ്ജയൻ , ഡോ. സി.വി. ജയമണി, ശ്രീ.വി. മഹേഷ് ഡോ. കെ.എം മധുസൂതനൻ പ്പിള്ള, ശ്രീ. കെ.വി. രാജശേഖരൻ തുടങ്ങിയവർ സംസാരിച്ചു.
