കൊച്ചി: ശ്രീരാമചന്ദ്രന്‍ വനവാസത്തിന് ശേഷം അയോദ്ധ്യയില്‍ പ്രവേശിച്ചപ്പോള്‍ പ്രജകള്‍ ദീപം തെളിയിച്ച് സ്വികരിച്ചത് പോലെ, അയോദ്ധ്യയിലെ രാമജന്മഭൂമി തീര്‍ത്ഥ ക്ഷേത്രത്തില്‍ പ്രാണപ്രതിഷ്ഠ നടക്കുന്ന 2024 ജനുവരി 22 ന് , കേരളത്തില്‍ 50 ലക്ഷം ഹിന്ദുവീടുകളില്‍ പ്രതീകാത്മകമായി ഭദ്രദീപം തെളിയിക്കുമെന്ന് ശ്രീരാമജന്മഭൂമി തീര്‍ത്ഥക്ഷേത്ര ട്രസ്റ്റ് സംസ്ഥാന ഭാരവാഹികളായ വിജി തമ്പി, വി.ആര്‍ രാജശേഖരന്‍, ജിജേഷ് പട്ടേരി എന്നിവര്‍ വാര്‍ത്താസമ്മേളനത്തില്‍ അറിയിച്ചു. ഇതിനായി ജനുവരി ഒന്നുമുതല്‍ 15 വരെ ഭവനസമ്പര്‍ക്കം നടത്തുകയും അയോധ്യയില്‍ നിന്നും പൂജിച്ച് കൊണ്ടുവന്ന അക്ഷതവം ഭവനത്തില്‍ എത്തിക്കുമെന്ന് ഇവര്‍ പറഞ്ഞു.കേരളത്തില്‍ നിന്നും 25 സന്യാസിമാരുടെ നേതൃത്വത്തില്‍ വിവിധ ഹിന്ദു സമൂദായിക പ്രതിനിധികള്‍ ഉള്‍പ്പെടെ 100 പേര്‍ പ്രത്യേക ക്ഷണിതാക്കളായി പ്രാണപ്രതിഷ്ഠാ ചടങ്ങില്‍ നേരിട്ട് പങ്കെടുക്കും. കൂടാതെ 2000 പേര്‍ പരിപാടിയില്‍ സംബന്ധിക്കും. പ്രാണപ്രതിഷ്ഠ നടക്കുന്ന സമയത്ത് കേരളത്തിലെ മുഴുവന്‍ ഗ്രാമങ്ങളിലെയും പ്രധാന ക്ഷേത്രങ്ങളില്‍ രാമ ഭക്തര്‍ ഒരുമിച്ച് കൂടി രാമമന്ത്ര ജപം, ആരതി എന്നിവയോടുകൂടി അയോധ്യയിലെ പ്രാണപ്രതിഷ്ഠാ ചടങ്ങ് തത്സമയം വീക്ഷിക്കും. ആയിരക്കണക്കിന് ഹിന്ദുഭക്തരുടെ ചുടു ചോര വീണ് കുതിര്‍ന്ന അയോദ്ധ്യയിലെ കര്‍മ്മ ഭൂമി ബലിധാനികള്‍ക്ക് മുമ്പില്‍ ശിരസ്സ് നമിക്കും. ഇത് ശ്രീരാമജന്മഭൂമി തീര്‍ത്ഥക്ഷേത്ര ട്രസ്റ്റിന്റെ കൂടി വിജയാഘോഷമാണെന്നും സംസ്ഥാന ഭാരവാഹികള്‍ വാര്‍ത്താ സമ്മേളനത്തില്‍ അറിയിച്ചു.
Discussion about this post