തിരുവനന്തപുരം: കേന്ദ്രമന്ത്രിയും ആറ്റിങ്ങല് മണ്ഡലത്തിലെ എന്ഡിഎ സ്ഥാനാര്ത്ഥി വി. മുരളീധരന്റെ വാഹന പര്യടനത്തിനു നേരെ സിപിഎം ആക്രമണം. സംഭവത്തിന് നേതൃത്വം നല്കിയത് സിപിഎം പഞ്ചായത്ത് മുന് അംഗത്തിന്റെ മകന്. പോലീസ് എത്തുന്നത് വരെ പര്യടനം നിര്ത്തിവച്ചു.
ഇന്ന് വൈകിട്ട് ഏഴേകാലോടെ പള്ളിക്കല് പകല്ക്കുറി കൊട്ടിയംമുക്കിലാണ് ആക്രമണം ഉണ്ടായത്. ബൈക്കിലെത്തിയ മൂന്നംഗ സംഘം പര്യടനത്തിലെ വാഹന വ്യൂഹത്തിലേക്ക് കടന്നുകയറി. സ്ത്രീകള് ഉള്പ്പെടുന്ന ബൈക്ക് യാത്രികരെയും കേന്ദ്രമന്ത്രിയും സ്ഥാനാര്ത്ഥിയുമായ വി. മുരളീധരനെയും അസഭ്യം പറഞ്ഞ് ആക്രമിക്കാന് ശ്രമിക്കുകയായിരുന്നു. പ്രവര്ത്തകരോട് സമാധാനം പാലിക്കാന് കര്ശന നിര്ദ്ദേശം നല്കിയശേഷം അദ്ദേഹം പള്ളിക്കല് പോലീസുമായി ബന്ധപ്പെട്ടു. കേന്ദ്രമന്ത്രിയുടെ സുരക്ഷാ ഉദ്യാഗസ്ഥനും പോലീസില് വിവരം അറിയിച്ചു. പള്ളിക്കല് പോലീസ് എത്തിയ ശേഷമാണ് പര്യടനം തുടര്ന്നത്.
അരമണിക്കൂറോളം പര്യടനം തടസ്സപ്പെട്ടു. കല്ലറകോണം ജങ്ഷനിലും അക്രമിസംഘം സംഘര്ഷത്തിന് ശ്രമം നടത്തി. സിപിഎം കൊടി വീശി പ്രവര്ത്തകരെ പ്രകോപിപ്പിച്ചുകൊണ്ടായിരുന്നു കല്ലറകോണത്ത് സംഘര്ഷത്തിന് ശ്രമം നടത്തിയത്. തെരഞ്ഞെടുപ്പ് കമ്മിഷനില് പരാതി നല്കുമെന്നും സംഭവത്തിന് പിന്നിലുള്ളവര് പരാജയഭീതിയില് ആക്രമണം അഴിച്ചുവിടാന് ശ്രമിക്കുകയാണെന്നും വി. മുരളീധരന് പറഞ്ഞു.
Discussion about this post