അഹമ്മദാബാദ്: അഫ്ഗാനിസ്ഥാന്, ബംഗ്ലാദേശ്, പാകിസ്ഥാന് എന്നിവിടങ്ങളില് നിന്ന് വന്ന് ഗുജറാത്തിലെ ആനന്ദ്, മെഹ്സാന ജില്ലകളില് താമസക്കാരായവര്ക്ക് പൗരത്വം നല്കാന് കേന്ദ്രസര്ക്കാര് തീരുമാനിച്ചു. ഈ രാജ്യങ്ങളില് നിന്നുള്ള ഹിന്ദുക്കള്, സിഖ്, ബുദ്ധ, ജൈന, പാഴ്സി, ക്രിസ്ത്യന് അഭയാര്ത്ഥികള്ക്ക് 1955 ലെ പൗരത്വ നിയമപ്രകാരമാണ് പൗരത്വം അനുവദിക്കുന്നത്. 2019ല് പാര്ലമെന്റ് അംഗീകരിച്ച സിഎഎ അഫ്ഗാന്, ബംഗ്ലാദേശ്, പാകിസ്ഥാന് എന്നിവിടങ്ങളില് നിന്നുള്ള ഹിന്ദു, സിഖ്, ബുദ്ധ, ജൈന, പാഴ്സി, ക്രിസ്ത്യന് വിഭാഗങ്ങള്ക്ക് പൗരത്വം വ്യവസ്ഥ ചെയ്യുന്നുണ്ടെങ്കിലും നിയമങ്ങള് സര്ക്കാര് ഇനിയും രൂപപ്പെടുത്തിയിട്ടില്ലാത്തതിനാലാണ് 55ലെ നിയമപ്രകാരം പൗരത്വം നല്കാന് തീരുമാനമെടുത്തത്.
ആഭ്യന്തര മന്ത്രാലയത്തിന്റെ വിജ്ഞാപനമനുസരിച്ച്, ഇവര്ക്ക് സെക്ഷന് 5 പ്രകാരം ഇന്ത്യന് പൗരനായി രജിസ്ട്രേഷന് അനുവദിക്കുകയോ പൗരത്വ സര്ട്ടിഫിക്കറ്റ് നല്കുകയോ ചെയ്യും. പൗരത്വത്തിനായി സമര്പ്പിക്കുന്ന അപേക്ഷകള് ജില്ലാതലത്തില് കളക്ടര് പരിശോധിച്ച് ഉറപ്പാക്കും. അപേക്ഷയും റിപ്പോര്ട്ടുകളും ഒരേസമയം കേന്ദ്ര സര്ക്കാരിന് ഓണ്ലൈനായി ലഭിക്കും.
മുഴുവന് പ്രക്രിയയും പൂര്ത്തിയാക്കിയ ശേഷം, കളക്ടര്, നിര്ദേശിക്കുന്ന പ്രകാരം പൗരത്വം നല്കും, വിജ്ഞാപനത്തില് പറയുന്നു. 2014 ഡിസംബര് 31 വരെ ഇന്ത്യയിലെത്തിയ ബംഗ്ലാദേശ്, പാകിസ്ഥാന്, അഫ്ഗാനിസ്ഥാന് എന്നിവിടങ്ങളില് നിന്നുള്ള കുടിയേറ്റക്കാര്ക്കാണ് പൗരത്വം നല്കുന്നത്.
Discussion about this post