കോട്ടയം: സംസ്ഥാന സര്‍ക്കാരിന്റെ അഭിഭാഷകവിരുദ്ധ നിലപാടിന്റെ തുടര്‍ച്ചയാണ് കഴിഞ്ഞ ദിവസങ്ങളില്‍ പട്ടാമ്പിയില്‍ പോലീസും എറണാകുളത്ത് ഹൈക്കോടതി ജഡ്ജിയും സ്വീകരിച്ചതെന്ന് അഭിഭാഷക പരിഷത് സംസ്ഥാന ജനറല്‍ സെക്രട്ടറി ബി. അശോക്.
അഭിഭാഷക സംരക്ഷണ നിയമം അടിയന്തരമായി ഏര്‍പ്പെടുത്തണമെന്ന ആവശ്യത്തേട് സര്‍ക്കാര്‍ മുഖംതിരിക്കുകയാണ്. സര്‍ക്കാരിന്റെ അഭിഭാഷക വിരുദ്ധ നിലപാട് പോലീസിനെ ഉപയോഗിച്ച് നടപ്പാക്കാനുള്ള ശ്രമമാണ് പട്ടാമ്പിയില്‍ കരാര്‍ എഴുതി നല്കിയ അഭിഭാഷകരെ പ്രതിയാക്കി കേസ് രജിസ്റ്റര്‍ ചെയ്തതില്‍ നടന്നിട്ടുള്ളത്. അഭിഭാഷകരുടെ തൊഴില്‍ ചെയ്യാനുള്ള അവകാശത്തിന്മേലുള്ള ഇത്തരം കൈകടത്തലുകള്‍ അനുവദിക്കില്ലെന്നും അദ്ദേഹം പറഞ്ഞു.
കക്ഷികളുടെ നിര്‍ദേശപ്രകാരം തയാറാക്കുന്ന കരാറുകളും ഹര്‍ജികളും അഭിഭാഷകന്റെ സൃഷ്ടിയെന്ന നിലയില്‍ കണ്ട് ക്രിമിനല്‍ കേസുകളില്‍ പ്രതിയാക്കി അഭിഭാഷകരെ ഭയപ്പെടുത്തി വായടപ്പിക്കാനുള്ള പോലീസിന്റെ ശ്രമം വര്‍ധിച്ചുവരികയാണ്. അതിക്രമങ്ങള്‍ ശ്രദ്ധയില്‍പെടുത്തിയിട്ടും അഭിഭാഷക സംരക്ഷണ നിയമം നടപ്പാക്കാന്‍ തയാറാകാത്ത നിയമമന്ത്രിയുടെ മൗനം കുറ്റകരമാണ്. അസുഖത്താല്‍ ക്ലേശിതനായ അഭിഭാഷകന് ആശുപത്രിയില്‍ പോകാനുള്ള അവസരം നിഷേധിച്ചതും കേസില്‍ കക്ഷിയുടെ താത്പര്യം മുന്‍നിര്‍ത്തി ചികിത്സക്കിടയില്‍ നിന്നും എത്തിയപ്പോള്‍ ധിക്കാരപരമായി കേസ് മാറ്റിയതും നീതിപീഠത്തിന്റെ മനുഷ്യത്വരഹിത മുഖത്തിന്റെയും ധാര്‍ഷ്ട്യത്തിന്റെയും തെളിവാണ്.
നീതിനിര്‍വഹണ സംവിധാനത്തില്‍ ന്യായാധിപര്‍ക്കും അഭിഭാഷകര്‍ക്കും തുല്യ ചുമതലയും പങ്കുമാണുള്ളത്. അഭിഭാഷകര്‍ക്ക് അവശ്യമായ പരിഗണന നല്കാതെയുള്ള കൊളോണിയല്‍ സംസ്‌കാരത്തിന്റെ കാലം കഴിഞ്ഞുവെന്ന് ബന്ധപ്പെട്ടവര്‍ മനസിലാക്കണം. ഒറ്റപ്പെട്ട സംഭവങ്ങള്‍ തെറ്റായ സന്ദേശം നല്കുകയും മറ്റുള്ളവരിലേക്ക് വ്യാപിക്കാനും ഇടയാക്കുമെന്നതിനാല്‍ ആവര്‍ത്തിക്കാതിരിക്കാനുള്ള നടപടികള്‍ ഉത്തരവാദപ്പെട്ടവര്‍ സ്വീകരിക്കണമെന്ന് അദ്ദേഹം ആവശ്യപ്പെട്ടു.
Discussion about this post