കൊച്ചി: കേരള പത്രപ്രവര്‍ത്തക യൂണിയന്‍ അംഗങ്ങളായ എ.ആര്‍. പ്രവീണ്‍കുമാര്‍, അജീഷ് ചന്ദ്രന്‍ എന്നിവരെ എറണാകുളം പ്രസ് ക്ലബ് അനുസ്മരിച്ചു. കൊച്ചി ജന്മഭൂമിയിലെ സീനിയര്‍ ആര്‍ട്ടിസ്റ്റ് എ.ആര്‍. പ്രവീണ്‍കുമാര്‍, കൊച്ചി മനോരമ ന്യൂസിലെ ന്യൂസ് ക്യാമറമാന്‍ അജീഷ് ചന്ദ്രന്‍ എന്നിവരുടെ ഓര്‍മകള്‍ പങ്കുവെച്ച അനുസ്മരണ യോഗം കെയുഡബ്ല്യുജെ സംസ്ഥാന സെക്രട്ടറി എം. ഷജില്‍ കുമാര്‍ ഉദ്ഘാടനം ചെയ്തു. പ്രസ് ക്ലബ് പ്രസിഡന്റ് എം.ആര്‍. ഹരികുമാര്‍ യോഗത്തില്‍ അധ്യക്ഷനായി.
ജന്മഭൂമി ന്യൂസ് എഡിറ്റര്‍ മുരളി പാറപ്പുറം എ.ആര്‍. പ്രവീണ്‍കുമാറിനെ അനുസ്മരിച്ച് സംസാരിച്ചു. മികച്ച ചിത്രകാരനൊപ്പം നല്ലൊരു സംഗീത പ്രതിഭയുമായിരുന്നു അദ്ദേഹമെന്നും കോളജ് കാലത്ത് ഒരുമിച്ച് വിദ്യാഭ്യാസം നടത്താനായതും അദ്ദേഹം ഓര്‍ത്തെടുത്തു. പേജ് ഡിസൈനിങ്ങില്‍ പ്രവീണ്‍ അത്ഭുതകരമായ പ്രതിഭയാണ് പ്രകടിപ്പിച്ചിരുന്നത്. അദ്ദേഹവുമായി നാല് പതിറ്റാണ്ടായുള്ള അടുത്ത ബന്ധം ഉണ്ടായിരുന്നതായും വലിയ സൗഹൃദവലയത്തിന് ഉടമയായിരുന്നു പ്രവീണെന്നും മുരളി പാറപ്പുറം പറഞ്ഞു.
വിശ്വസിച്ച് ഏത് ജോലിയും ഏല്‍പ്പിക്കാന്‍ പറ്റിയിരുന്ന അസാമാന്യ പ്രതിഭയായിരുന്നു അജീഷെന്ന് മനോരമ ന്യൂസ് മുന്‍ പ്രിന്‍സിപ്പല്‍ ക്യാമറമാന്‍ പി.ജെ. ചെറിയാന്‍ പറഞ്ഞു. വ്യത്യസ്തമായി ദൃശ്യങ്ങള്‍ ചിത്രീകരിച്ച് അജീഷ് ഏറെ ശ്രദ്ധയാകര്‍ഷിച്ചിരുന്നതായും മനോരമ ന്യൂസിന്റെ തുടക്കം മുതലുള്ള ആളെയാണ് നഷ്ടമായതെന്നും അദ്ദേഹം അനുസ്മരിച്ചു. യോഗത്തില്‍ പ്രവീണ്‍കുമാറിന്റെ സഹോദരന്‍ എ.ആര്‍. പീതാംബരന്‍, പ്രസ് ക്ലബ് സെക്രട്ടറി എം. സൂഫി മുഹമ്മദ്, ട്രഷറര്‍ മനു ഷെല്ലി എന്നിവര്‍ സംസാരിച്ചു.
Discussion about this post