തിരുവനന്തപുരം: ദേശീയ സേവാഭാരതി കേരളത്തിന്റെ വാർഷിക പ്രതിനിധി സമ്മേളനം തൃശൂരിൽ സെപ്റ്റംബർ 8 ന് രാവിലെ 9: 30 മുതൽ വൈകിട്ട് നാല് വരെ പ്രസിഡൻ്റ് ഡോ. രഞ്ജിത്ത് വിജയഹരിയുടെ അദ്ധ്യക്ഷതയിൽ ചേരും. തൃശ്ശൂർ ഭാരതീയ വിദ്യാഭവൻ ഓഡിറ്റോറിയത്തിലാണ് സമ്മേളനമെന്ന് വാർത്താ സമ്മേളനത്തിൽ പ്രസിഡൻ്റ് ഡോ. രഞ്ജിത്ത് വിജയഹരി, വൈസ് പ്രസിഡന്റ് ഡി വിജയൻ , തിരുവനന്തപുരം ജില്ലാ വൈസ് പ്രസിഡന്റ് ഡോ. സാബു കെ നായർ തുടങ്ങിയവർ അറിയിച്ചു.
കേരളത്തിലെ 14 ജില്ലകളിൽ നിന്നുമുള്ള പ്രതിനിധികൾ പങ്കെടുക്കുന്ന പൊതുയോഗത്തിൽ കഴിഞ്ഞ ഒരു വർഷത്തെ പ്രവർത്തനം വിലയിരുത്തുകയും അടുത്ത വർഷത്തേക്കുള്ള ഭാരവാഹികളെ തിരഞ്ഞെടുത്ത് ഭാവി പ്രവർത്തന പദ്ധതി അവതരിപ്പിക്കുകയും ചെയ്യും.
വയനാട് മേപ്പാടി പഞ്ചായത്തിൽ മുണ്ടക്കൈ, ചൂരൽ മല, അട്ടമല പ്രദേശത്ത് ഉണ്ടായ ഉരുൾപൊട്ടലുമായി ബന്ധപ്പെട്ട് സേവാഭാരതി 18 വിഭാഗങ്ങൾ കേന്ദ്രീകരിച്ച് നിരന്തര സേവന പ്രവർത്തനങ്ങളിൽ വ്യാപൃതരായിരുന്നു. പ്രതിദിനം 1500 ലധികം സന്നദ്ധ പ്രവർത്തകർ പങ്കെടുത്തു. മേപ്പാടി സിഎസ് ഐ ചർച്ച്, മാതാ അമൃതാനന്ദമയിമഠം എന്നിവ കേന്ദ്രീകരിച്ച് നടത്തിയിരുന്ന സേവനകേന്ദ്രങ്ങളിലൂടെ ആയിരത്തിലധികം ദുരന്തബാധിതർക്ക് കൈത്താങ്ങാകുവാൻ സേവാഭാരതിക്ക് സാധിച്ചു.
ദുരന്തബാധിതരിൽ അവശേഷിക്കുന്നവർക്കായി കേന്ദ്ര-കേരള സർക്കാരുകൾ നടത്തിക്കൊണ്ടിരിക്കുന്ന പുനരധിവാസ പ്രവർത്തനങ്ങൾക്കൊപ്പം ദേശീയ സേവാഭാരതി കേരളഘടകവും ഒത്തുചേരും. പദ്ധതികളും കർമ്മ പദ്ധതിയും വാർഷിക പൊതുയോഗത്തിൽ അവതരിപ്പിക്കും.
തലചായ്ക്കാനൊരിടം പദ്ധതിയിലൂടെ ഭവന നിർമ്മാണവും, ഭൂദാനം പദ്ധതിയിലൂടെ അഞ്ച് ഏക്കർ ഭൂമി സമാഹരണം നടത്തി അർഹതപ്പെട്ടവർക്ക് ഭൂമിയും വീടും നൽകും.
വിദ്യാർത്ഥികൾക്ക് നിരന്തരമായ പഠന സൗകര്യങ്ങളും താമസ സൗകര്യങ്ങളും ലഭ്യമാക്കും.
ദുരിത ബാധിതർക്ക് മാനസിക പരിചരണത്തിന് പുനർജനി കൗൺസിലിങ് സെന്റർ വഴിയും ആരോഗ്യ പ്രശ്നങ്ങൾക്ക് സേവാഭാരതിയുടെ പാലിയേറ്റിവ് സംവിധാനങ്ങൾ വഴിയും സാന്ത്വനമേകും.
സ്വയം തൊഴിൽ കണ്ടെത്തുവാനുള്ള സാമഗ്രികളും സൗകര്യങ്ങളും നൈപുണ്യ വികസന പരിശീലനങ്ങളും ലഭ്യമാക്കും.
ദുരന്താനന്തരം ഒറ്റപ്പെട്ടു പോയവർക്ക് പ്രായഭേദമന്യേ സേവാഭാരതി നടത്തിക്കൊണ്ടിരിക്കുന്ന സ്ഥാപനങ്ങളിലൂടെ ആജീവനാന്ത സംരക്ഷണം ഉറപ്പ് വരുത്തും.
എല്ലാ ജില്ലകളിലും സേവാഭാരതിയുടെ ആപത് സേവാ (Disaster Management) പരിശീലനം ഊർജിതപ്പെടുത്തി കൂടുതൽ പ്രവർത്തകരെ സജ്ജമാക്കും, ഭാരവാഹികൾ പറഞ്ഞു.
Discussion about this post