കാലടി: ശ്രീശങ്കരാചാര്യര് ഉള്പ്പെടെ പല മഹാപുരുഷന്മാരും ജനിച്ചിട്ടേയില്ലായെന്ന് ഒരു പ്രചാരണം അടുത്തകാലത്തായി ഉണ്ടായിട്ടുണ്ടെന്ന് എഴുത്തുകാരന് സി. രാധാകൃഷ്ണന് പറഞ്ഞു. അവരുടെ കൃതികള് വേറെ ആരോ എഴുതി ഉണ്ടാക്കിയതാണ് എന്നാണ് പ്രചാരണമെന്നും അദ്ദേഹം പറഞ്ഞു. കാലടി ശ്രീശങ്കരാചാര്യ സംസ്കൃത സര്വകലാശാലയില് ശ്രീശങ്കരജയന്തി സമ്മേളനത്തില് സംസാരിക്കുകയായിരുന്നു അദ്ദേഹം. പൂന്താനം, ഭട്ടതിരിപ്പാട് തുടങ്ങിയ മഹാപുരുഷന്മാര് ജനിച്ചിട്ടില്ലായെന്നും അവരുടെ കൃതികള് മാറ്റാരോ എഴുതിയതാണെന്നാണ് പ്രചാരണം നടത്തുന്നത്. ഇനി നാളെ ഞാന് തന്നെ ജനിച്ചിട്ടില്ല എന്നും പ്രചാരണം ഉണ്ടായേക്കാമെന്നും രാധാകൃഷ്ണന് പറഞ്ഞു.
കേരളീയ നവോത്ഥാനത്തിന്റെ തുടക്കം തന്നെ ശ്രീശങ്കരാചാര്യരില് നിന്നാണ്. യൂണിവേഴ്സല് ആയ ഹ്യൂമനിസം അക്കാലത്ത് തന്നെ ഉണ്ടായിരുന്നു. തികച്ചും വ്യക്തവും ദൃഢവും ദാര്ശനികവും സ്പഷ്ടവുമായ പദ്ധതിയാണ് ശ്രീശങ്കരാചാര്യ കൃതികളിലൂടെ കടന്നുവരുന്നത്. ഭക്തിപ്രസ്ഥാനത്തിന് നിദാനമായി അതിനെ അംഗീകരിക്കുകയും ചെയ്തു. ശ്രീനാരായണഗുരുവും ചട്ടമ്പിസ്വാമികളും ഉള്പ്പെടുന്ന മഹാഗുരുക്കള് ഈ മഹാസഞ്ചയത്തിലേക്ക് എത്തുകയായിരുന്നു. നമ്മുടെ നവോത്ഥാനം തുടര്ച്ചയാണ്. ഈ കാലഘട്ടത്തിന്റെ അവസാനത്തിലാണ് സോഷ്യലിസം എന്ന ചിന്തയുണ്ടായത്. അതിനുവേണ്ടി വഴിതെളിച്ചത് ഈ പ്രസ്ഥാനം ആയിരുന്നു. ഈ ധനം ആരുടേതാണെന്ന് ആദ്യമായി ചോദിച്ചത് ഈശാവാസ്യ മഹര്ഷിയായിരുന്നു. ധനം കൂട്ടി വയ്ക്കരുത് പങ്കുവച്ച് അനുഭവിക്കണം എന്നും മഹര്ഷി പറഞ്ഞു. ധനം തലമുറകളുടെയോ പിതാവിന്റെയോ പരമ്പരയായി കിട്ടിയതോ ആയാലും പങ്കുവെച്ച് അനുഭവിക്കണം. എന്താണ് മനുഷ്യകുലത്തിന്റെ ലക്ഷ്യമെന്ന് മഹര്ഷി പറഞ്ഞുതരുന്നു. എന്നെപ്പോലെ കണ്ട് എല്ലാവരെയും സമന്മാരായി കാണണമെന്നു പറഞ്ഞത് കാറല് മാക്സ് അല്ല. ലോകത്തില് ആദ്യമായി ഇടത് സര്ക്കാര് കേരളത്തില് അധികാരത്തില് വന്നത് കാറല് മാക്സിനെ പഠിച്ചു ആ ആശയത്തിലേക്ക് പോയതുകൊണ്ടല്ല. മഹാപ്രസ്ഥാനത്തിന്റെ ഭാഗമായുള്ള തുടര്ച്ചയായിരുന്നു. ഇതിപ്പോഴും തുടര്ന്നുകൊണ്ടേയിരിക്കുന്നു. നമുക്ക് ലോകത്തിന് നല്കാനുള്ള അറിവാണ് ഇതൊന്നും സി. രാധാകൃഷ്ണന് പറഞ്ഞു.
