അഞ്ചരക്കണ്ടി ഡെൻ്റൽ കോളേജിൽ നിതിൻ രാജ് ആത്മഹത്യ ചെയ്യാൻ കാരണക്കാരയവരെ ഉടൻ അറസ്റ്റ് ചെയ്യണമെന്ന് ഹിന്ദു ഐക്യവേദി സംസ്ഥാന പ്രസിഡൻ്റ് ആർ വി ബാബു ആവശ്യപ്പെട്ടു. സംഭവം നടന്ന് ദിവസങ്ങൾ പിന്നിട്ടിട്ടും കുറ്റക്കാരെ കണ്ടെത്താൻ കഴിയാത്തത് പോലിസിൻ്റെ അനാസ്ഥയാണ് . പട്ടികജാതി പട്ടികവർഗ്ഗ വിഭാഗത്തിൽപെട്ടവർക്ക് കേരളത്തിൽ അർഹമായ നീതി ലഭിക്കുന്നില്ല. പട്ടികവിഭാഗക്കാർക്ക് നേരെയുള്ള അവഗണനയും അധിക്ഷേപവും ദിനം പ്രതി വർദ്ധിച്ച് വരുന്ന ഒരു സംസ്ഥാനമായി കേരളം അധപതിച്ചിരിക്കുന്നു. നമ്മുടെ നവോത്ഥാന പാരമ്പര്യത്തിന് കളങ്കം ചാർത്തുന്ന സംഭവങ്ങളാണ് ഈ വിഭാഗങ്ങൾക്ക് നേരെ നടന്നുവരുന്നതെന്ന് ബാബു പറഞ്ഞു. പട്ടികവിഭാഗങ്ങൾക്കുള്ള ആനുകൂല്യങ്ങൾ നൽകാതിരിക്കുകയും അവർക്കുള്ള വികസന ഫണ്ട് വകമാറ്റി ചിലവാക്കുകയോ ലാപ്സാക്കുകയോ ചെയ്യുന്നതും ഇതിന് ഉദാഹരണങ്ങളാണ്. പോസ്റ്റ് മെട്രിക് സ്കോളർഷിപ്പ് , പെൺകുട്ടികൾക്കുള്ള വിവാഹ ധനസഹായം, ലൈഫ് പദ്ധതിയിൽ ഉൾപ്പെടുത്തിയ പട്ടിക വിഭാഗങ്ങൾക്കുള്ള ഭവനപദ്ധതി തുടങ്ങിയവക്ക് നൽകേണ്ട ധനസഹായം വിതരണം നടത്താതെ അവരെ സർക്കാർ പൂർണ്ണമായും അവഗണിക്കുകയാണ് . സർക്കാരിൻ്റെ അവഗണനകൾക്കെതിരായും അവരുടെ ന്യായമായ അവകാശങ്ങൾക്കു വേണ്ടിയും പട്ടികവിഭാഗ സംഘടനകൾ നടത്തുന്ന പ്രക്ഷോഭങ്ങൾക്ക് ഹിന്ദു ഐക്യവേദി സർവ്വ പിന്തുണയും നൽകുമെന്ന് ബാബു അറിയിച്ചു .
Discussion about this post