“നമ്മുടെ ആദർശം” പ്രകാശനം ചെയ്തു

കൊല്ലം : തലവൂർ ശ്രീഭദ്ര ആഡിറ്റോറിയത്തിൽ നടക്കുന്ന ദക്ഷിണ കേരള പ്രാന്തീയ പ്രചാരക ബൈഠക്കിൽ കുരുക്ഷേത്ര പ്രകാശൻ പ്രസിദ്ധീകരിച്ച നമ്മുടെ ആദർശം എന്ന പുസ്തകം സംഘത്തിൻ്റെ അഖില ഭാരതീയ പ്രചാരക് പ്രമുഖ് സാന്ത്വരഞ്ജൻ മുതിർന്ന പ്രചാരകനായ എസ് സേതുമാധവന് നൽകി പ്രകാശം ചെയ്തു. രാഷ്‌ട്രീയ സ്വയംസേവക സംഘത്തിൻ്റെ സ്ഥാപകനായ ഡോ. കേശവ ബലിറാം ഹെഡ്ഗേവാറിൻ്റെതപോമയ ജീവിതത്തെ കാണുകയും അനുഭവിച്ചറിയുകയും ചെയ്ത സഹപ്രവർത്തകരായ ഒമ്പത് കാര്യകർത്താക്കൻമാരുടെ സ്മൃതികളുടെ സമാഹാരമാണ് ഈ പുസ്തകം.

സംഘ സ്ഥാപകൻ്റെ ജീവിതത്തിൻ്റെ വിവിധവശങ്ങളെക്കുറിച്ച് നേർകാഴ്ച നൽകുന്ന അനുസ്മരണങ്ങളാണ് ഈ സമാഹാരത്തിൽ ഉൾപ്പെടുത്തിയിരിക്കുന്നത്. ഡോക്ടർജിയുടെ മൗലിക ചിന്ത , സ്വഭാവം, സംഘടനാ വീക്ഷണം , പ്രവർത്തന ശൈലി , സമൂഹത്തിൽ അദ്ദേഹം ഉണ്ടാക്കിയ പ്രഭാവം എന്നിവയെക്കുറിച്ചുള്ള സൂക്ഷ്മമായ വിശകലനം ഇതിലടങ്ങിയിട്ടുണ്ട്. ശ്രീ ഗുരുജി ഗോൾവൽക്കറുടെ ചിന്തോദ്ദീപകമായ ഒരു പ്രഭാഷണവും പുസ്തകത്തിൻ്റെ ആദ്യ ലേഖനമായി ഉൾപ്പെടുത്തിയിട്ടുണ്ട്. ശ്രീഭാരതീ പ്രകാശൻ നാഗ്പൂർ പ്രസിദ്ധീകരിച്ച ഹമാരാ ആദർശ് എന്ന ഹിന്ദി പുസ്തകത്തിൻ്റെ ലളിത സുന്ദരമായ പരിഭാഷ നിർവ്വഹിച്ചത് പ്രാന്തീയ കാര്യകാരി അംഗമായ പാ. സന്തോഷ് ആണ്. കുരുക്ഷേത്ര പ്രകാശനാണ് പ്രസാധകർ. 106 പേജുള്ള പുസ്തകത്തിൻ്റെ മുഖവില 140 രൂപയാണ്.