ആലപ്പുഴ: ഭാരതത്തിന്റെ വൈഭവത്തിനായി യുവതീയുവാക്കള് അണിനിരന്ന് പ്രവര്ത്തിക്കണമെന്ന സ്വാമി വിവേകാനന്ദന്റെ സ്വപ്നം സാക്ഷാത്ക്കരിക്കുകയാണ് ആര്എസ്എസ് ചെയ്യുന്നതെന്ന് ദക്ഷിണ ക്ഷേത്രിയ സംഘചാലക് ഡോ. വന്നിയരാജന്. ആര്എസ്എസ് ശതാബ്ദി ആചരണത്തിന്റെ ഭാഗമായി നടത്തിയ പ്രബുദ്ധപൗര സംഗമത്തില്, സംഘത്തിന്റെ വൈചാരിക അടിത്തറ എന്ന വിഷയത്തില് സംസാരിക്കുകയായിരുന്നു അദ്ദേഹം.
എല്ലാവര്ക്കും വേണ്ടി സംഘം നിലനില്ക്കുന്നു, അതുകൊണ്ട് തന്നെ സമൂഹത്തിലെ വിവിധ മേഖലകളിലും പ്രവര്ത്തിക്കാന് സംഘത്തിലൂടെ പല സംഘടനകള് രൂപപ്പെടുന്നു. സംഘത്തിന് ആരോടും വിരോധമില്ല, എല്ലാവര്ക്കും വേണ്ടി സംഘം എണ്ണയിട്ട യന്ത്രം പോലെ പ്രവര്ത്തിക്കുന്നു. റാഡിക്കല് ഹ്യൂമനിസം എന്ന എം.എന്. റോയിയുടെ സിദ്ധാന്തം അദ്ദേഹത്തിന് മുമ്പേ വ്യക്തി നിര്മാണത്താല് സമൂഹത്തില് നടപ്പിലാക്കിയത് സംഘമാണ്. വ്യക്തി നിര്മാണത്തിലൂടെ സമൂഹം പരിവര്ത്തനപ്പെടുന്നു. ഇതിലൂടെ ദേശീയതക്ക് ശക്തിയേറുന്നു, അദ്ദേഹം പറഞ്ഞു.
ആര്എസ്എസിന്റെ വിജയരഹസ്യം തീഷ്ണവും സ്ഥിരതയുമായ സേവനമാണെന്ന് ആലപ്പുഴ ബാറിലെ മുതിര്ന്ന അഭിഭാഷകന് എ. ഫ്രാന്സിസ് മംഗലത്ത് അദ്ധ്യക്ഷ പ്രഭാഷണത്തില് പറഞ്ഞു. അധികാരമോ, പ്രചാരണമോ അല്ല അതിന്റെ വിജയകാരണം. നൂറു വര്ഷം എന്നത് നിസാര കാലയളവല്ല, രണ്ട് ലോകമഹായുദ്ധങ്ങള്, ഭാരതത്തിന്റെ സ്വാതന്ത്ര്യം, രാഷ്ട്രത്തിന്റെ വിഭജനാനന്തരം ഉണ്ടായ അഭയാര്ത്ഥി പ്രശ്നം, പ്രകൃതിക്ഷോഭങ്ങള്, യുദ്ധങ്ങള് തുടങ്ങി നിരവധി പ്രതിബന്ധങ്ങളും വെല്ലുവിളികളുമാണ് ഇക്കാലയളവില് ഉണ്ടായത്. പ്രതിസന്ധി ഘട്ടങ്ങളെ നിസ്വാര്ത്ഥമായി ആര്എസ്എസ് പ്രവര്ത്തകര് നേരിട്ടു. വൈവിദ്ധ്യങ്ങളെ ഉള്ക്കൊള്ളുന്ന വിശാലതയാണ് ഭാരതത്തിന്റെ സവിശേഷത, അതാണ് ആര്എസ്എസും പിന്തുടരുന്നത്. ക്രൈസ്തവ വിശ്വാസിയായ തനിക്ക് ഇത്തരമൊരു പരിപാടിയില് അദ്ധ്യക്ഷ പദവി നല്കിയതു തന്നെ ഈ സന്ദേശത്തിന്റെ ഭാഗമാണ്. തലമുറകളിലൂടെ കൈമാറിയ മൂല്യബോധമാണ് ആര്എസ്എസിനെ നയിക്കുന്നതെന്നും അദ്ദേഹം പറഞ്ഞു.
സംഘശതാബ്ദിയും പഞ്ചപരിവര്ത്തനവും എന്ന വിഷയത്തില് ദക്ഷിണ കേരള പ്രാന്ത പ്രചാരക് എസ്. സുദര്ശന് സംസാരിച്ചു. നാടിന് അനുഗ്രഹമായ അഞ്ച് തത്വങ്ങളാണ് പഞ്ചപരിവര്ത്തനത്തില് ഉള്പ്പെട്ടിരിക്കുന്നത്. ഇത് സമൂഹത്തെയും, സമൂഹത്തിന്റെ അടിസ്ഥാന മണ്ഡലമായ കുടുംബത്തിനും ശക്തിയേകുമെന്ന് അദ്ദേഹം പറഞ്ഞു. ജില്ലാ സേവാ പ്രമുഖ് ശ്രികുമാര് സ്വാഗതവും, ജില്ലാ പ്രചാര് പ്രമുഖ് പ്രദീപ് നന്ദിയും പറഞ്ഞു.
Discussion about this post