ആലുവ: ആലുവ കേശവസ്മൃതിയിൽ ചേർന്ന ഗീതാ സ്വാധ്യായ സമിതി സംസ്ഥാന സഞ്ചാലക സമിതി യോഗത്തിൽ സുപ്രധാന തീരുമാനം.
സമിതിയുടെ ആഭിമുഖ്യത്തിൽ 2027 ജനുവരി 2, 3 തീയതികളിൽ തിരുവനന്തപുരത്ത് വെച്ച് അന്തർദേശീയ ഭഗവദ് ഗീതാ സെമിനാർ നടത്താൻ തീരുമാനിച്ചു.
2000-ൽ ഭാരതീയവിചാരകേന്ദ്രം സംഘടിപ്പിച്ച ഗീതാ ഇന്റർനാഷണൽ സെമിനാറിന്റെ രജത ജൂബിലി ആഘോഷമായും, സ്വർഗീയ പി. പരമേശ്വർജിയുടെ ജന്മശതാബ്ദി ആഘോഷങ്ങളുടെ തുടക്കമായുമാണ് ഈ സെമിനാർ സംഘടിപ്പിക്കുന്നത്.
ഇതിനു മുന്നോടിയായി എല്ലാ ജില്ലകളിലും ജില്ലാതല ഭഗവദ് ഗീതാ സമ്മേളനങ്ങളും സത്സംഗ വേദികളും സംഘടിപ്പിക്കും.
യോഗത്തിൽ എല്ലാ ജില്ലകളിൽ നിന്നുമുള്ള പ്രതിനിധികളും സംയോജകരും പങ്കെടുത്തു.
ഭാരതീയവിചാരകേന്ദ്രം ഡയറക്ടർ ആർ. സഞ്ജയൻ, അധ്യക്ഷൻ ഡോ. സി.വി. ജയമണി, ജനറൽ സെക്രട്ടറി ഡോ. എൻ. സന്തോഷ് കുമാർ, സ്വാധ്യായ സമിതി സംസ്ഥാന സംയോജകൻ രാമൻ കീഴന എന്നിവർ സംസാരിച്ചു.
