ശ്രീനഗര്: തീവ്രവാദികള്ക്കായി പാകിസ്ഥാനില് നിന്ന് ഡ്രോണ് വഴി ഇറക്കിയ വെടിമരുന്നും ആയുധങ്ങളും ജമ്മു പോലീസ് പിടിച്ചെടുത്തു. ജമ്മു അതിര്ത്തിമേഖലയിലാണ് സംഭവം. ജയിലില് കഴിയുന്ന ലഷ്കര്-ഇ-തൊയ്ബ (എല്ഇടി) കമാന്ഡര് നല്കിയ വിവരത്തിന്റെ അടിസ്ഥാനത്തിലാണ് ആയുധങ്ങള് പിടിച്ചെടുത്തത്. തെരച്ചിലിനിടെ നടന്ന ഏറ്റുമുട്ടലില് ഒരു ഭീകരന് വെടിയേറ്റു. ഇയാളെ പിന്നീട് ജമ്മുവിലെ ജിഎംസി ആശുപത്രിയിലെത്തിച്ച് അറസ്റ്റ് ചെയ്തു.
അന്താരാഷ്ട്ര അതിര്ത്തിക്കുസമീപം ആയുധങ്ങള് കണ്ടെത്തുന്നതിനായി തെരച്ചില് നടത്തിയ പോലീസ് സംഘത്തിന് നേരെ പോലീസുകാരില് നിന്നുതന്നെ റൈഫിള് തട്ടിപ്പറിച്ച് വെടിയുതിര്ത്ത ഭീകരനാണ് പ്രത്യാക്രമണത്തില് പരിക്കേറ്റത്. മുഹമ്മദ് അലി ഹുസൈന്, ഖാസിം എന്നീ പേരുകളില് അറിയപ്പെടുന്ന ജഹാംഗീറിനെയാണ് വെടിവച്ചുവീഴ്ത്തിയതെന്ന് അഡീഷണല് ഡയറക്ടര് ജനറല് ഓഫ് പോലീസ് മുകേഷ് സിങ് പറഞ്ഞു.
ഒരു എകെ റൈഫിള്, ഒരു മാഗസിന്, 40 ബുള്ളറ്റുകള്, ഒരു പിസ്റ്റള്, രണ്ട് പിസ്റ്റള് മാഗസിനുകള്, രണ്ട് ഗ്രനേഡുകള്, വെടിമരുന്ന് എന്നിവയാണ് പിടിച്ചെടുത്തത്. ഫെബ്രുവരി 24 ന് അര്ണിയ സെക്ടറില് ഡ്രോണ് വഴി ആയുധം ഉപേക്ഷിച്ച കേസില് അന്വേഷണം നടക്കുന്നതിനിടെയാണ് പുതിയ വിവരം പോലീസിന് ലഭിച്ചത്. പിടിയിലായ ജഹാംഗീര് ലഷ്കര്, അല്-ബദര് ഭീകരസംഘങ്ങളില്പ്പെട്ട ആളാണ്.
Discussion about this post