ന്യൂഡൽഹി: സഹകാർ ഭാരതിയുടെ നേതൃത്വത്തിൽ നടത്തിയ ക്രെഡിറ്റ് കോ-ഓപ്പറേറ്റിവ് സൊസൈറ്റി ഭാരവാഹികളുടെ ദേശീയ സമ്മേളനം സമാപിച്ചു. ഇന്നലെ നടന്ന സമാപന സമ്മേളനത്തിൽ കേന്ദ്രമന്ത്രി ഭഗവന്ത് കരാട് മുഖ്യാതിഥിയായി.
ചടങ്ങിൽ ഇന്ത്യയിലെ വിജയിച്ച ക്രെഡിറ്റ് സഹകരണ സംഘങ്ങളെ ഭഗവന്ത് കരാട് അഭിനന്ദിച്ചു. മഹാരാഷ്‌ട്ര ആസ്ഥാനമായുള്ള ധ്യാന്ദീപ് ക്രെഡിറ്റ് കോ-ഓപ്പറേറ്റീവ് സൊസൈറ്റി, ആദർശ നഗരി സഹകാരി പത്സൻസ്ത, തെലങ്കാന ആസ്ഥാനമായുള്ള സിറ്റിസൺ ക്രെഡിറ്റ് കോഓപ്പറേറ്റീവ് സൊസൈറ്റി എന്നിവ ദേശീയ തല വിഭാഗത്തിൽ ഉൾപ്പെട്ട ക്രെഡിറ്റ് സഹകരണ സംഘങ്ങളെയാണ് കേന്ദ്രമന്ത്രി ആദരിച്ചത്.
ക്രെഡിറ്റ് കോ-ഓപ്പറേറ്റീവ് സൊസൈറ്റികൾ നേരിടുന്ന വെല്ലുവിളികളെകുറിച്ചും അതിജീവനമാർഗങ്ങളെക്കുറിച്ചും ദ്വിദിന സമ്മേളനത്തിൽ ചർച്ച ചെയ്തു. വിവിധ സംസ്ഥാനങ്ങളിൽ നിന്നിള്ള പതിനായിരം പ്രതിനിധികളാണ് പങ്കെടുത്തത്.
ഈ മാസം രണ്ടാം തിയതി ആരംഭിച്ച ദേശീയ സമ്മേളനം കേന്ദ്ര കൃഷിവകുപ്പ് മന്ത്രി നരേന്ദ്ര സിങ് തോമറാണ് ഉദ്ഘാടനം ചെയ്തത്. ഡൽഹി പുസ റോഡ് ഐസിഎആർ-ഐഎആർഐ മൈതാനിയിയിൽ നടന്ന ചടങ്ങിൽ സഹകാർഭാരതി ദേശീയ അദ്ധ്യക്ഷൻ ഡി.എൻ. ഠാക്കൂർ അദ്ധ്യക്ഷത വഹിച്ചു. കേന്ദ്ര സഹകരണവകുപ്പ് സഹമന്ത്രി ബി.എൽ. വർമ്മ, സ്വാഗതസംഘം ചെയർമാൻ രാധേശ്യാം ചന്ദക്, ദേശീയ ജനറൽ സെക്രട്ടറി ഡോ. ഉദയ് ജോഷി തുടങ്ങിയവരും ഉദ്ഘാടന സമ്മേളനത്തിൽ പങ്കെടുത്തു.
Discussion about this post