രാമസേതുവിന്റെ സമുദ്രാന്തര്പ്പാത ഭൂപടം നിര്മിച്ച് ഐ.എസ്.ആര്.ഒ. 2018 ഒക്ടോബര് മുതല് 2023 ഒക്ടോബര് വരെയുള്ള ആറുവര്ഷക്കാലത്ത് ശേഖരിച്ച വിവരങ്ങള് ഉപയോഗപ്പെടുത്തിയാണ് ഭൂപടം നിര്മിച്ചത് . നാസയുടെ ICESat-2 ഉപഗ്രഹത്തിന്റെ നൂതന ലേസർ സാങ്കേതികവിദ്യയാണ് ഇതിനായി ഉപയോഗിച്ചിരിക്കുന്നത്.
രാമസേതു സ്ഥിതിചെയ്യുന്നിടത്ത് ആഴം വളരെ കുറവായിരുന്നതിനാല് കപ്പൽ ഉപയോഗിച്ചുള്ള മാപ്പിങ് ബുദ്ധിമുട്ടായിരുന്നു. അതുകൊണ്ട് രാമസേതുവിന്റെ ഉയർന്ന ഭാഗങ്ങളിൽ മാത്രമായിരുന്നു ഗവേഷണം നടന്നിരുന്നത്. ICESat-2 ഉപയോഗിച്ച് കൂടുതല് ആഴത്തില് പഠനം നടത്താന് കഴിഞ്ഞതായി ഐ.എസ്.ആർ.ഒയുടെ ജോധ്പൂർ, ഹൈദരാബാദ് നാഷണൽ റിമോട്ട് സെൻസിങ് സെന്ററുകളില് നിന്നുള്ള ഗവേഷകര് പറയുന്നു.
നാസയുടെ ഉപഗ്രഹമായ ICESat-2 ന്റെ വാട്ടർ പെൻട്രേറ്റഡ് ഫൊട്ടോണുകൾ ഉപയോഗിച്ച് നിര്മിച്ച രാമസേതു (ആദംസ് ബ്രിജ്)വിന്റെ അതിസങ്കീർണ വിവരങ്ങൾ നൽകുന്ന ആദ്യ റിപ്പോർട്ടാണിത് . രാമസേതുവിനെ കുറിച്ചും അതിന്റെ ഉത്ഭവത്തെക്കുറിച്ചും കൂടുതല് മനസ്സിലാക്കാൻ ഈ കണ്ടെത്തലുകൾ സഹായിക്കും.
രാമസേതുവിന്റെ 99.8% ഭാഗവും വെള്ളത്തില് മുങ്ങിക്കിടക്കുകയാണെന്ന് പഠനം സ്ഥിരീകരിക്കുന്നുണ്ട്. മാന്നാർ ഉൾക്കടലിനും പാക്ക് കടലിടുക്കിനും ഇടയിൽ വെള്ളം ഒഴുകാൻ അനുവദിക്കുന്ന 2 മുതല് 3 മീറ്റർ വരെ ആഴമുള്ള 11 ഇടുങ്ങിയ ചാനലുകളും കണ്ടെത്തിയിട്ടുണ്ട്. ചുണ്ണാമ്പുകല്ലുകളുടെ ശൃംഖലയാല് നിര്മിതമാണ് രാമസേതു.
Discussion about this post