അന്താരാഷ്ട്ര ചലച്ചിത്രോത്സവത്തിൽ നാരീശക്തിയുടെ തിളക്കം; സ്കിൻ ഓഫ് യൂത്ത് മികച്ച ചിത്രം; മേളയിൽ പ്രദർശിപ്പിച്ചത് 50 സംവിധായികമാരുടെ ചിത്രങ്ങൾ

പനജി : വിയറ്റ്നാമീസ് സംവിധായിക ആഷ് മെയ്ഫെയറിൻ്റെ “സ്കിൻ ഓഫ് യൂത്തി “നാണ് ഇത്തവണത്തെ ഗോൾഡൻ പീക്കോക്ക് അവാർഡ്.

ട്രാൻസ്‌ജെൻഡർ വ്യക്തികളുടെ സ്വത്വബോധം, സ്നേഹം, അതിജീവനം, അന്തസ്സ്, എന്നിവ ഒരു ചർച്ചയ്ക്കെന്നോണം തിരശ്ശീലയിലെത്തിക്കുന്ന ചിത്രമാണ് ‘സ്കിൻ ഓഫ് യൂത്ത്’ ‘. സംവിധായിക ആഷ് മേയ്ഫേറിൻ്റെ സ്വന്തം ട്രാൻസ്‌ജെൻഡർ സഹോദരിയുടെ ജീവിതത്തിൽ നിന്ന് പ്രചോദനം ഉൾക്കൊണ്ട് എടുത്ത ചിത്രം കൂടിയാണിത്.ഗോൾഡൻ പീക്കോക്ക് അവാർഡിൽ മാത്രമല്ല, 50 സംവിധായികമാരുടെ ചിത്രങ്ങളിലും നാരീശക്തിയുടെ തിളക്കമുണ്ട്.വിവിധ മേഖലകളിൽ ഭാരതം മുന്നോട്ട് വയ്ക്കുന്ന നാരീശക്തി സിനിമാ മേഖലയിലും പ്രകടമാണെന്ന് ഐ.എഫ്.എഫ് .ഐ 2025 സാക്ഷ്യം നിൽക്കുന്നു.ഉത്തരാ സിംഗിൻ്റെ ഹിന്ദി ചിത്രം “പിഞ്ച് “,അസമിൽ നിന്നുള്ള നമ്രത ദത്തയുടെ ‘പത്രലേഖ ” , ബംഗാളി സംവിധായിക രശ്മി മിത്രയുടെ ബാറോബാബു, ഉദ്ഘാടനദിവസം ആദ്യഷോയിലിടം നേടിയകൊങ്ങിണി ഭാഷയിലുള്ള ശോഭിത കുണ്ടർക്കർ സംവിധാനം ചെയ്ത ഹലദ് (Halad) ഉൾപ്പെടെ 50 സംവിധായികമാരുടെ ചിത്രങ്ങളാണ് മേളയിൽ പ്രദർശിപ്പിച്ചത്. നാരീശക്തിയുടെ പ്രതിഫലനങ്ങളായി അടയാളപ്പെടുത്തപ്പെടുമ്പോൾത്തന്നെ വിവിധ ഭാഷകളും, ജീവിതവും, പ്രാദേശിക സംസ്ക്കാരവുമെല്ലാം, സ്ക്രീനിൽ തെളിയും വിധം ഭാരതത്തിൻ്റെ വൈവിധ്യങ്ങളെ കൂടി ഈ ചിത്രങ്ങൾ പ്രതിനിധാനം ചെയ്യുന്നുണ്ട്.

മേളയുടെ സമാപന ചടങ്ങിൽ ഗോവ മുഖ്യമന്ത്രി ഡോ: പ്രമോദ് സാവന്തിൻ്റെ വാക്കുകൾ അതിനെ അടിവരയിടുന്നു. അത് ഇങ്ങിനെയായിരുന്നു ” സമൂഹത്തിൻ്റെ പൊതുബോധത്തെ മാറ്റിമറിക്കാനും, സാമൂഹ്യമാറ്റത്തിന് പ്രേരണ നൽകാനും, വൈവിധ്യത്തിലധിഷ്ഠിതമായ ഏകതയെ ശക്തിപ്പെടുത്താനും, പൈതൃകത്തെ സംരക്ഷിക്കാനും ഒരു പരിവർത്തന ശക്തി എന്ന നിലയിൽ സിനിമയ്ക്ക് കഴിയും. “