തിരുവനന്തപുരം: സംസ്ഥാനത്ത് മഴ കനക്കും. മദ്ധ്യ-പടിഞ്ഞാറൻ ബംഗാൾ ഉൾക്കടലിൽ ന്യൂനമർദ്ദം രൂപപ്പെട്ടതോടെയാണ് മഴ ശക്തമാകുന്നത്. ആന്ധ്രാ-ഒഡീഷ തീരത്തെ ചക്രവാതച്ചുഴി ന്യൂനമർദ്ദമായി മാറിയതോടെയാണ് മഴ കനക്കുന്നത്.
ന്യൂനമർദ്ദത്തിന്റെ സ്വാധീനഫലമായി കേരളത്തിന്റെ കിഴക്കൻ മേഖലയിലാണ് മഴയ്ക്ക് സാധ്യതയുള്ളത്. ഇന്ന് നാല് ജില്ലകളിൽ യെല്ലോ അലർട്ട് പ്രഖ്യാപിച്ചു. ആലപ്പുഴ,എറണാകുളം,ഇടുക്കി,പാലക്കാട് ജില്ലകളിലാണ് യെല്ലോ അലർട്ട്. അടുത്ത രണ്ട് ദിവസത്തിനുള്ളിൽ ന്യൂനമർദം ആന്ധ്രാ പ്രദേശ് തീരത്തേക്ക് നീങ്ങാനാണ് സാധ്യതയെന്നാണ് വിലയിരുത്തൽ.
കഴിഞ്ഞ കുറച്ച് ദിവസങ്ങളായി സംസ്ഥാനത്ത് പലയിടങ്ങളിൽ ശക്തമായ മഴ ലഭിക്കുന്നുണ്ട്. തിരുവനന്തപുരം,എറണാകുളം,കോഴിക്കോട്, കണ്ണൂർ എന്നീ ജില്ലകളിൽ കഴിഞ്ഞ ദിവസം മഴ ലഭിച്ചിരുന്നു. കോഴിക്കോട്ടെ ഉറുമി പുഴയിൽ ഇന്നലെ അപ്രതീക്ഷിതമായി ശക്തമായ മലവെള്ളപ്പാച്ചിലുണ്ടായി. വൃഷ്ടി പ്രദേശത്ത് മഴ കനത്തതോടെ മലമ്പുഴ ഡാമിന്റെ ഷട്ടറുകൾ തുറന്നിട്ടുണ്ട്.
Discussion about this post