പാലക്കാട്: സേവാസംഗമത്തിലൂടെ ഹൈന്ദവ ഹൃദയങ്ങളെയും വീടുകളെയും ഏകോപിപ്പിക്കാന് കഴിയണമെന്ന് ചിന്മയമിഷന് ആചാര്യന് സ്വാമി അശേഷാനന്ദ പറഞ്ഞു. 28, 29 തീയതികളില് മുനിസിപ്പല് സ്റ്റേഡിയത്തില് നടക്കുന്ന സേവാഭാരതി സേവാസംഗമത്തിന്റെ പന്തല് കാല്നാട്ട് കര്മം നിര്വഹിച്ച് സംസാരിക്കുകയായിരുന്നു അദ്ദേഹം. ഹൈന്ദവ സംസ്കാരത്തെയും സനാതനധര്മത്തെയും മുറുകെപ്പിടിച്ചു കൊണ്ടു മാത്രമെ മുന്നോട്ടു പോകാന് കഴിയൂ. ഒരുകാലത്ത് ലോക ഗുരുപദവി നേടിയിരുന്ന ഭാരതം ഇന്ന് വീണ്ടും ആ സ്ഥാനത്തേക്ക് എത്തിക്കൊണ്ടിരിക്കുകയാണ്. ഋഷിതുല്യനായ ഒരു ഭരണാധികാരിയുണ്ടെന്നതില് നമുക്കേവര്ക്കും അഭിമാനിക്കാമെന്നും അദ്ദേഹം കൂട്ടിച്ചേര്ത്തു. ലഹരിമുക്ത കേരളം, ആരോഗ്യയുക്ത കേരളം എന്നതാണ് സംഗമത്തിന്റെ സന്ദേശം.
ജില്ലാ പ്രസിഡന്റ് ഡോ. പി. ജയദേവന് അധ്യക്ഷത വഹിച്ചു. ആര്എസ്എസ് പ്രാന്ത സേവാപ്രമുഖ് എം.സി. വത്സന്, സഹസേവാപ്രമുഖ് യു.എന്. ഹരിദാസ്, സ്വാഗതസംഘം വൈസ് ചെയര്മാന് റിട്ട. അഡ്മിറല് കെ. മുരളീധരന്, ദേശീയ സേവാഭാരതി സംഘടനാ സെക്രട്ടറി എം.ടി. കിരണ്കുമാര്, ജനറല് സെക്രട്ടറി സി. വിജയന്, വൈസ് പ്രസിഡന്റ് ഡോ. ശ്രീരാം ശങ്കര്, സെക്രട്ടറിമാരായ പി.ആര്. സജീവന്, കെ. സുരേഷ് സംസാരിച്ചു. ആനിക്കോട് സാന്ദീപനി സാദനാലയം ആചാര്യന് ശ്യാം ചൈതന്യ പങ്കെടുത്തു.
