പൊന്കുന്നം(കോട്ടയം): തോട്ടയ്ക്കാട് പഞ്ചാലി, പ്ലാത്തോട്ടം ബീന, വേണാട്ടുമറ്റം ചെമ്പകം, വേപ്പിന്മൂട് ഇന്ദിര, ഗുരുവായൂര് ദേവി, തോട്ടയ്ക്കാട് കുഞ്ഞുലക്ഷ്മി, വേണാട്ടുമറ്റം കല്യാണി, കുമാരനെല്ലൂര് പുഷ്പ, പ്ലാത്തോട്ടം മീര, ഗജരാജകുമാരിമാര്, റാണിമാര്.. ഗജമേളകളിലേക്ക് പുത്തന് എഴുന്നള്ളത്ത്.
കോട്ടയത്തിനു കിഴക്കുള്ള കൊച്ചു ഗ്രാമമായ കൊടുങ്ങൂരിലാണ് പുതുമകള് നിറഞ്ഞ ഗജമേള അരങ്ങേറിയത്. ഗ്രാമപ്പഞ്ചായത്തു പ്രസിഡന്റ് വി.പി. റെജിയുടെ വാക്കുകള് കടമെടുത്താല് ലോക ചരിത്രത്തില് തന്നെ ആദ്യമായിരിക്കും പിടിയാനകള്ക്കായി ഒരു ഗജമേള.
പേരുകേട്ട വമ്പത്തത്തിന് എടുത്തുപിടിച്ച കൊമ്പുകളും തലപ്പൊക്കവും മാത്രമാവില്ല ഇനി വിലയിരുത്തപ്പെടുക.. നിലത്തിഴയുന്ന തുമ്പിയും വാലും തേന് നിറമുള്ള കണ്ണുകളും നഖങ്ങളുടെ എണ്ണത്തിനൊപ്പം ഭംഗിയും വിലയിരുത്തപ്പെടുന്നത് പിടിയാനകളുടേതും കൂടിയാവും.
ഗജമേളകള് ഗജരാജന്മാര്ക്ക് മാത്രം എന്ന കീഴ്വഴക്കം കൊടുങ്ങൂരുകാര് മാറ്റിയെഴുതിയിരിക്കുന്നു. പ്രധാന പൂരങ്ങളിലെല്ലാം കൊമ്പന്മാര് മാത്രം അരങ്ങുവാഴുമ്പോള് ഒരൊറ്റ കൊമ്പനെപ്പോലും കൊടുങ്ങൂരിന്റെ ഏഴയല്പക്കത്ത് അടുപ്പിക്കാതെ എണ്ണം പറഞ്ഞ ഒന്പതു സുന്ദരികള് കൊടുങ്ങൂരില് കളം കയ്യിലെടുത്തു.
ഈ നവസുന്ദരികളില് നിന്നും അതി സുന്ദരിയെ തെരഞ്ഞെടുക്കുവാന് ശ്രീകുമാര് അരൂക്കുറ്റി, ശൈലേഷ് വൈക്കം, അഡ്വ.രാജേഷ് പല്ലാട്ട് എന്നിവരുടെ വിദഗ്ധ പാനലിനും പാടുപെടേണ്ടിവന്നു. ഒടുവില് റാണിമാരില് കേമിയായി കോട്ടയത്തിന്റെ സുന്ദരി തോട്ടക്കാട്ട് കുഞ്ഞുലക്ഷ്മിയുടെ പേര് പ്രഖ്യാപിച്ചത് ഹര്ഷാരവത്തോടെ ആനപ്രേമികള് സ്വീകരിക്കുകയായിരുന്നു.
Discussion about this post