എസ്എസ്എൽസി പരീക്ഷാ ഫലം മെയ് 20 ന്, പ്ലസ് ടു ഫലം മെയ് 25ന്; ഗ്രേസ് മാർക്കുണ്ടാവില്ലെന്ന് വിദ്യാഭ്യാസ മന്ത്രി, ജൂണ്‍ ഒന്നിന് സ്‌കൂള്‍ തുറക്കും

തിരുവനന്തപുരം: ഈ വർഷത്തെ എസ്എസ്എൽസി പരീക്ഷാ ഫലം മെയ് 20 ന് പ്രസിദ്ധീകരിക്കുമെന്ന് വിദ്യാഭ്യാസ മന്ത്രി വി ശിവൻകുട്ടി. മെയ് 25ന് പ്ലസ് ടു പരീക്ഷാഫലവും പ്രഖ്യാപിക്കും. ഇത്തവണ ഗ്രേസ് മാർക്കുണ്ടാവില്ല. വേനലവധിക്കു ശേഷം ജൂണ്‍ ഒന്നിന് തന്നെ സ്‌കൂള്‍ തുറക്കുമെന്നും മന്ത്രി അറിയിച്ചു.

ഈ വർഷം 4,19,362 റഗുലർ വിദ്യാർഥികളും 192 പ്രൈവറ്റ് വിദ്യാർത്ഥികളുമാണ് എസ്എസ്എൽസി പരീക്ഷ എഴുതിയത്. ഇതിൽ 2,13,801 പേർ ആൺകുട്ടികളും 2,05,561പേർ പെൺകുട്ടികളുമാണ്. ഗൾഫ് മേഖലയിൽ 518 വിദ്യാർഥികളും ലക്ഷദ്വീപിൽ 289 വിദ്യാർഥികളും ഇക്കൊല്ലം പരീക്ഷ എഴുതി. ഹയർ സെക്കൻഡറിയിൽ 4,42,067 വിദ്യാർഥികളാണ് പരീക്ഷ എഴുതിയത്.

സ്കൂൾ തുറക്കലുമായി ബന്ധപ്പെട്ട് വിപുലമായ പരിപാടികൾ ആവിഷ്ക്കരിച്ചിട്ടുണ്ട്. പാഠപുസ്തകം 80 ശതമാനം എത്തിക്കഴിഞ്ഞുവെന്നും വിദ്യാഭ്യാസ മന്ത്രി പറഞ്ഞു.