തിരുവല്ല: മണിപ്പുഴ ഭഗവതിക്ഷേത്ര ഉത്സവം ഇത്തവണ ആദ്യപകുതിയിലേക്ക് കടക്കുമ്പോള്‍ ആഘോഷ നടത്തിപ്പ് പെണ്‍കരുത്തില്‍ ഭദ്രം. ആര്‍എസ്എസ് ജന്മശതാബ്ദിയോട് അനുബന്ധിച്ച് തുടക്കമിട്ട വനിതാ കൂട്ടായ്മയാണ് ഉത്സവ നടത്തിപ്പ് ഏറ്റെടുത്തു വനിതാ ശാക്തീകരണവും സ്വയംപര്യാപതയും തെളിയിക്കുന്നത്. സംഘപ്രവര്‍ത്തനം സജീവമായ മണിപ്പുഴയില്‍, ഇത്തവണത്തെ ഉത്സവാഘോഷം വനിതാ കൂട്ടായ്മയില്‍ ആവട്ടെ എന്ന തീരുമാനം കരക്കാര്‍ ഒറ്റക്കെട്ടായാണ് കൈക്കൊണ്ടത്.
പൗര്‍ണമി സംഘവും മാതൃസമിതിയും നാരായണീയ സമിതിക്കാരും അണിനിരന്നതോടെ കാര്യങ്ങള്‍ ഉഷാറായി. പിരിവ് മുതല്‍ സൂക്ഷ്മമായ സംഘാടനം വരെ എല്ലാ കാര്യങ്ങള്‍ക്കും മുമ്പില്‍ ഈ പെണ്‍സംഘമുണ്ട്.
ഉത്സവാഘോഷ സമിതി രക്ഷാധികാരിയും പ്രസിഡന്റും ജനറല്‍ കണ്‍വീനറും ജോയിന്റ് കണ്‍വീനര്‍മാരുമെല്ലാം സ്ത്രീകള്‍തന്നെ. സഹകരണവകുപ്പ് അസിസ്റ്റന്റ് ഡയറക്ടര്‍ ഗീതാ സുരേഷ് ആണ് കമ്മിറ്റി രക്ഷാധികാരി. നെടുമ്പ്രം പഞ്ചായത്ത് ആശാ വര്‍ക്കര്‍ ഉഷാ രമേശ് പ്രസിഡന്റും അധ്യാപിക ജി. ജയന്തി വൈസ് പ്രസി.ഡന്റുമാണ്. പൊതുപ്രവര്‍ത്തകയായ മഞ്ജു പ്രദീപ് ആണ് കണ്‍വീനര്‍.
അധ്യാപിക രോഹിണി(ഫിനാന്‍സ്), ഗ്രാമപ്പഞ്ചായത്ത് മുന്‍അംഗം രാജശ്രീ ശ്രീകുമാര്‍(ഫുഡ്), അധ്യാപിക വി. നീ (പബ്ലിസിറ്റി), സ്മിത(പ്രോഗ്രാം), ശ്രീകല(പൂജ) തുടങ്ങിയവര്‍ ഉപസമിതി കണ്‍വീനര്‍മാരായുണ്ട്. കമ്മിറ്റി അംഗങ്ങളായും സ്ത്രീകളുണ്ട്.
പ്രപഞ്ചശക്തിയായ പരാശക്തിയുടെ ഉത്സവാഘോഷം ഏറ്റെടുത്ത് നടത്തുന്നതില്‍ ഏറെ സന്തോഷമുണ്ടെന്ന് ഉത്സവ സമിതി പ്രസിഡന്റ് ഉഷാ രമേശ് പറഞ്ഞു. ഉച്ചഭാഷിണി അനുമതി, കലാപരിപാടി ബുക്കിങ് വീടുകളില്‍ സംഭാവന ശേഖരിക്കാനിറങ്ങുന്നതും ഉച്ചഭാഷിണിക്ക് പോലീസ് അനുമതി എടുത്തതും വഴിപാട്, കലാപരിപാടി തുടങ്ങിയവ ബുക്കുചെയ്യുന്നതും എല്ലാം സ്ത്രീകളുടെ മേല്‍നോട്ടത്തിലാണ്. വീട്ടു കാര്യങ്ങള്‍ കഴിഞ്ഞ് ഒരു സംഘം ഉച്ചവരെയും അടുത്തസംഘം ഉച്ചതിരിഞ്ഞുമാണ് ഇറങ്ങുക. ഉദ്യോഗസ്ഥരായ സ്ത്രീകള്‍ ജോലി കഴിഞ്ഞുവന്ന് ഇവരെ സഹായിക്കും.
സാധാരണക്കാരായ അമ്മമാര്‍ മുതല്‍ ജോലിത്തിരക്കുള്ള സ്ത്രീകള്‍വരെ ഇത്തവണത്തെ ഉത്സവ കമ്മിറ്റിയിലുണ്ട്. എന്നാല്‍ കഴിഞ്ഞ് ഒരുമാസക്കാലമായി അവരെല്ലാം ഉത്സവകാര്യങ്ങളില്‍ സജീവമാണെന്ന് ക്ഷേത്ര ഭരണസമിതി സെക്രട്ടറി അഡ്വ. എസ്. അനില്‍കുമാര്‍ പറഞ്ഞു.
പ്രധാന ഭാരവാഹികള്‍ക്ക് ഡ്രൈവിങ് അറിയാം. അതിനാല്‍ യാത്രയ്‌ക്ക് മറ്റാരെയും ആശ്രയിക്കേണ്ടതില്ല. രണ്ടു സംഘങ്ങളായാണ് പിരിവിനും മറ്റും ഇറങ്ങുന്നത്. പുരുഷന്മാരുടെ സഹകരണവും ഉണ്ടെന്നും അനിൽകുമാർ പറഞ്ഞു.
Discussion about this post