പത്തനംതിട്ട: സ്വധർമ്മം പാലിക്കുന്ന അധ്യാപകരെ സമൂഹം ആദരിക്കണമെന്ന് അഖില ഭാരതീയ രാഷ്‌ട്രീയ ശൈക്ഷിക് മഹാ സംഘ് (എ ബി ആർ എസ് എം) ദേശീയ സഹ സംഘടനാ സെക്രട്ടറി ഗുന്ത ലക്ഷ്മൺ അഭിപ്രായപ്പെട്ടു. മൂന്ന് ദിവസങ്ങളിലായി പത്തനംതിട്ടയിൽ നടക്കുന്ന ദേശീയ അധ്യാപക പരിഷത്തിന്റെ (എൻ ടി യു ) സംസ്ഥാന സമ്മേളനത്തിന്റെ ഭാഗമായ പ്രതിനിധി സമ്മേളനം അബാൻ ഓഡിറ്റോറിയത്തിൽ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
വിദ്യാഭ്യാസം രാഷ്‌ട്ര ഹിതത്തിനായിരിക്കണം, വിദ്യാഭ്യാസ ഹിതത്തിനനുസരിച്ച് പ്രവർത്തിക്കുന്നവരായിരിക്കണം അധ്യാപകർ. അത്തരത്തിൽ സ്വധർമത്തിൽ സ്ഥിതപ്രജ്ഞരായ അധ്യാപകർക്ക് ഹിതമായിരിക്കണം സമാജം. അധ്യാപകർ അഭിമുഖീകരിക്കുന്ന വിവിധ വിഷയങ്ങളെ സമുചിതമായി അഭിസംബോധന ചെയ്യുന്നതിനാൽ തന്നെ ദേശീയ അധ്യാപക പരിഷത്ത് വേറിട്ട അധ്യാപക സംഘടനയാണെന്ന് അദ്ദേഹം അഭിപ്രായപ്പെട്ടു.
ഗുരുർ ബ്രഹ്മ: ,ഗുരുർ വിഷ്ണു; ഗുരുർ ദേവോ മഹേശ്വര:, ഗുരുസാക്ഷാത്പരബ്രഹ്മ: എന്ന മഹത്തായ ആശയം പിന്തുടരുന്നവരാണ് ഭാരതീയർ. വ്യക്തികൾക്കതീതമായി ആശയങ്ങൾ കാലാതിവർത്തിയായി നിലനിൽക്കുന്നു. പ്രൗഢമായ ആ ആശയങ്ങൾ തിരിച്ചറിഞ്ഞ് അതിലൂന്നി വേണം നാം പ്രവർത്തിക്കണം. ABRSM എന്ന ദേശീയ സംഘടനയുടെ ഭാഗമായ NTU വിന്റെ എല്ലാ പ്രവർത്തനങ്ങളിലും ABRSM ഉണ്ടായിരിക്കുമെന്നും അദ്ദേഹം പറഞ്ഞു.
ദേശീയ അധ്യാപക പരിഷത്ത് സംസ്ഥാന പ്രസിഡന്റ് പി എസ് ഗോപകുമാർ അധ്യക്ഷത വഹിച്ചു. സംസ്ഥാന ജനറൽ സെക്രട്ടറി ടി അനൂപ് കു മാർ സ്വാഗതവും ട്രഷറർ കെ കെ ഗിരീഷ് കുമാർ നന്ദിയും പറഞ്ഞു. സംസ്ഥാന ഭാരവാഹികളായ ആർ ജിഗി, കെ സ്മിത, കെ പ്രഭാകരൻ നായർ, എം ടി സുരേഷ് കുമാർ, എ ജെ ശ്രീനി, കെ കെ രാജേഷ്, എ അരുൺ കുമാർ, കെ വി ബിന്ദു, ജെ ഹരീഷ് കുമാർ, എ വി ഹരീഷ്, കെ ഷാജി മോൻ, പി ശ്രീദേവി, പാറംകോട് ബിജു, ഹരി ആർ വിശ്വനാഥ്, പി സതീഷ് എന്നിവർ പങ്കെടുത്തു.
Discussion about this post