ന്യൂദല്ഹി: ലഡാക്ക് മേഖലയിലെ ഹോട്ട് സ്പ്രിങ് പട്രോളിങ് പോയിന്റില് നിന്ന് ചൈന പിന്മാറിയതോടെ നീണ്ടകാലമായി നിലനിന്ന വെല്ലുവിളികളില് നിന്ന് ഒന്നു കുറഞ്ഞുവെന്ന് വിദേശകാര്യമന്ത്രി എസ്. ജയശങ്കര്. ഉസ്ബെക്കിസ്ഥാനിലെ സമര്ഖണ്ടില് നടക്കുന്ന ഷാങ്ഹായ് കോ-ഓപ്പറേഷന് ഓര്ഗനൈസേഷന് (എസ്സിഒ) ഉച്ചകോടിക്ക് മുന്നോടിയായി ഫ്രഞ്ച് സഹമന്ത്രി കാതറിന് കൊളോണയുമായി ചേര്ന്ന് നടത്തിയ മാധ്യമ സംവാദത്തിനിടെയാണ് ജയശങ്കറിന്റെ പ്രതികരണം.
ഇന്തോ-പസഫിക്ക് മേഖലയിലെ സാഹചര്യങ്ങളും ചൈന ഉയര്ത്തുന്ന വെല്ലുവിളികളും ഇരുനേതാക്കളും തമ്മിലുള്ള സംഭാഷണത്തില് വിഷയമായെന്ന് കൊളോന പറഞ്ഞു. ഒരേ ആശങ്കകള് പങ്കിടുന്ന രാജ്യങ്ങളാണ് ഇന്ത്യയും ഫ്രാന്സുമെന്ന് അവര് ചൂണ്ടിക്കാട്ടി. ചൈനയുടെ പിന്മാറ്റം സംബന്ധിച്ച് കൂടുതലായൊന്നും പറയാനില്ലെന്ന് ജയശങ്കര് കൂട്ടിച്ചേര്ത്തു. വെല്ലുവിളികള് നിരവധിയാണ്. അതിലൊരു പ്രശ്നത്തിന് ശമനമുണ്ടായതായി കണക്കാക്കാം അദ്ദേഹം പറഞ്ഞു.
പാക്കിസ്ഥാന് കേന്ദ്രമാക്കിയ ഭീകരനേതാക്കളെ ആഗോള ഭീകരപ്പട്ടികയില് ഉള്പ്പെടുത്തുന്നതിനുള്ള ശ്രമങ്ങള്ക്ക് യുഎന് രക്ഷാസമിതിയില് ചൈന തടസ്സം നില്ക്കുകയാണ്. ഈ വിഷയത്തില് ഇന്ത്യയും ഫ്രാന്സും യോജിച്ചാണ് മുന്നോട്ടുനീങ്ങുന്നതെന്ന് ജയശങ്കര് പറഞ്ഞു. തീവ്രവാദികള് അന്താരാഷ്ട്ര സമൂഹത്തിനാകെ ഭീഷണിയാണ്. ആരെങ്കിലും ലിസ്റ്റിങ് തടയുകയാണെങ്കില്, അത് അവരുടെ ഭീകരവാദനിലപാട് തുറന്നുകാട്ടുന്നതിന് തുല്യമായിരിക്കുമെന്ന് അദ്ദേഹം പറഞ്ഞു.
Discussion about this post