തിരുവനന്തപുരം: തപസ്യ കലാസാഹിത്യവേദിയുടെ ഈ വര്‍ഷത്തെ അക്കിത്തം പുരസ്കാരം ശ്രീകുമാരന്‍ തമ്പിക്ക്. ഒരു ലക്ഷം രൂപയും പ്രശസ്തിഫലകവും അടങ്ങുന്നതാണ് പുരസ്കാരം. തിരുവനന്തപുരത്ത് വൈലോപ്പിള്ളി സംസ്‌കൃതിഭവനില്‍ ഡിസംബര്‍ 18ന് സംഘടിപ്പിക്കുന്ന മഹാകവി അക്കിത്തം അനുസ്മരണ പരിപാടിയില്‍ പുരസ്കാരം സമ്മാനിക്കുമെന്ന് തപസ്യ സംസ്ഥാന അധ്യക്ഷന്‍ പ്രൊഫ. പി.ജി. ഹരിദാസ് വാര്‍ത്താസമ്മേളനത്തില്‍ അറിയിച്ചു.
കവി പി. നാരായണക്കുറുപ്പ്, ആഷാമേനോന്‍, കല്ലറ അജയന്‍ എന്നിവരടങ്ങുന്ന ജൂറിയാണ് പുരസ്‌കാര നിര്‍ണയം നടത്തിയത്. കവി, ഗാനരചയിതാവ്, തിരക്കഥാകൃത്ത്, സംവിധായകന്‍, നിര്‍മാതാവ് എന്നീ നിലകളില്‍ വ്യക്തിമുദ്ര പതിപ്പിക്കുകയും മലയാള സാഹിത്യത്തെ സമ്പന്നമാക്കുകയും ഭാരതീയ സംസ്‌കാരത്തിന്‍റെ തനിമ ആവിഷ്‌കരിക്കുകയും ചെയ്ത പ്രതിഭാശാലിയായ ശ്രീകുമാരന്‍ തമ്പി അക്കിത്തവുമായി ആത്മബന്ധം പുലര്‍ത്തിയിരുന്ന ആളുമാണെന്ന് ജൂറി വിലയിരുത്തി.
തപസ്യ സംസ്ഥാന ഉപാധ്യക്ഷന്‍ കല്ലറ അജയന്‍, സെക്രട്ടറി ജി.എം. മഹേഷ്, തിരുവനന്തപുരം ജില്ലാ അധ്യക്ഷന്‍ ബിപിന്‍ ചന്ദ്രന്‍, കാര്യാധ്യക്ഷന്‍ കെ.വി. രാജേന്ദ്രന്‍ തുടങ്ങിയവരും വാര്‍ത്താസമ്മേളനത്തില്‍ പങ്കെടുത്തു.
Discussion about this post