കൊച്ചി: ശബരിമല വെർച്വൽ ക്യൂ ബുക്കിങ് സംവിധാനത്തിലെ ഗുരുതരമായ പൊരുത്തക്കേടുകൾ അടിയന്തരമായി അന്വേഷിക്കണമെന്ന് ശബരിമല കർമ്മസമിതി ആവശ്യപ്പെട്ടു. ഓരോ ദിവസങ്ങളിലെയും ബുക്കിങ് സ്ലോട്ടുകൾ പൂർണ്ണമായും തീർന്നതായി പോർട്ടൽ കാണിക്കുമ്പോഴും, അതിനനുസരിച്ചുള്ള ഭക്തജനസാന്നിധ്യം സന്നിധാനത്ത് ഉണ്ടാകാത്തത് ഗൗരവകരമായ സംശയങ്ങൾ ഉയർത്തുന്നതായി എസ്. ജെ. ശബരിമല കർമ്മസമിതി ജനറൽ കൺവീനർ ആർ. കുമാർ ചൂണ്ടിക്കാട്ടി.
വെർച്വൽ ക്യൂ ബുക്കിങ്ങിനായി പതിനായിരക്കണക്കിന് യഥാർത്ഥ അയ്യപ്പഭക്തർ ശ്രമിക്കുമ്പോൾ സ്ലോട്ട് ലഭിക്കാതെ നിരാശരാകുന്ന സാഹചര്യമുണ്ട്. എന്നാൽ, ബുക്ക് ചെയ്തിട്ടും ദിവസേന വലിയൊരു വിഭാഗം ഭക്തർ ദർശനത്തിന് എത്തുന്നില്ല. പ്രതിദിനം ഏകദേശം 20,000 മുതൽ 35,000 വരെ ബുക്ക് ചെയ്തവർ എത്താത്ത സാഹചര്യമുണ്ടെന്നാണ് ലഭിക്കുന്ന കണക്കുകൾ സൂചിപ്പിക്കുന്നത്. വൃശ്ചികം ഒന്നിന് 58,000-ത്തിലധികം ബുക്കിങ് ഉണ്ടായിട്ടും 40,000-ൽ താഴെ ഭക്തർ മാത്രമാണ് ദർശനത്തിനെത്തിയത് എന്നത് ഈ പൊരുത്തക്കേടിന്റെ ഗൗരവം വ്യക്തമാക്കുന്നു.
യാത്രക്കാരുടെ എണ്ണം ഉറപ്പാക്കാതെ അന്യസംസ്ഥാനങ്ങളിലെ ചില ടൂർ ഓപ്പറേറ്റർമാരോ ഏജൻസികളോ കൂട്ടത്തോടെ സ്ലോട്ടുകൾ ബുക്ക് ചെയ്ത് കൈവശം വയ്ക്കുന്നുണ്ടോ? ബുക്കിങ് സംവിധാനത്തിൽ ഏതെങ്കിലും തരത്തിലുള്ള കൃത്രിമത്വമോ ദുരുപയോഗമോ നടക്കുന്നുണ്ടോ? യഥാർത്ഥ ഭക്തർക്ക് ദർശനാവസരം നഷ്ടപ്പെടുത്തുന്ന തരത്തിലുള്ള ആസൂത്രിത ഇടപെടലുകൾ ഉണ്ടോ? ഇത്തരം സാധ്യതകളെല്ലാം പോലീസ്, ദേവസ്വം ബോർഡ്, ബന്ധപ്പെട്ട സാങ്കേതിക അധികൃതർ എന്നിവർ സമഗ്രമായി അന്വേഷിക്കണം.
വെർച്വൽ ക്യൂ ഭക്തരുടെ സൗകര്യത്തിനുള്ള സംവിധാനമാണ്; യഥാർത്ഥ ഭക്തർക്ക് ദർശനം നിഷേധിക്കുന്ന സംവിധാനമായി അത് മാറരുത്. കൂട്ടബുക്കിങ് ദുരുപയോഗം തടയുകയും ഉപയോഗിക്കാത്ത സ്ലോട്ടുകൾ മറ്റുള്ളവർക്ക് ലഭ്യമാക്കുകയും ബുക്കിങ്-ദർശന കണക്കുകൾ സുതാര്യമായി പ്രസിദ്ധീകരിക്കുകയും വേണം. സ്പോട്ട് ബുക്കിങ് നിയന്ത്രണങ്ങളും പുനഃപരിശോധിച്ച് യഥാർത്ഥ തീർത്ഥാടകർക്ക് ദർശനാവസരം ഉറപ്പാക്കണം.
വെർച്വൽ ക്യൂ ബുക്കിങ്ങിലെ ദുരൂഹതകൾ അവസാനിപ്പിച്ച് സുതാര്യവും ഭക്തജനസൗഹൃദവുമായ സംവിധാനം ഉറപ്പാക്കാൻ കേരള സർക്കാരും തിരുവിതാംകൂർ ദേവസ്വം ബോർഡും അടിയന്തരമായി ഇടപെടണമെന്ന് ശബരിമല കർമ്മസമിതി ആവശ്യപ്പെടുന്നു.














