അയോധ്യ: ഗുജറാത്തിലെ പുനരുത്ഥാന വിദ്യാപീഠം തയാറാക്കിയ 1051 പുസ്തകങ്ങള്‍ ഭഗവാന്‍ ശ്രീരാമന് സമര്‍പ്പിച്ച് പ്രകാശനം ചെയ്യുമെന്ന് വിദ്യാപീഠം വൈസ് ചാന്‍സലര്‍ ഇന്ദുമതി കത്വരെ. അയോധ്യയിലെ കര്‍സേവകപുരത്ത് മാധ്യമപ്രവര്‍ത്തകരോട് സംസാരിക്കുകയായിരുന്നു അവര്‍. ഏപ്രില്‍ 15ന് ആര്‍എസ്എസ് സര്‍സംഘചാലക് ഡോ. മോഹന്‍ ഭാഗവത് പുസ്തകങ്ങള്‍ പ്രകാശനം ചെയ്യും. നാലര വര്‍ഷത്തെ ഗവേഷണത്തിന്‍റെയും പഠനത്തിന്‍റെയും ഫലമാണ് രാംലാലയ്ക്ക് സമര്‍പ്പിക്കുന്ന പുസ്തകങ്ങള്‍. അവ ശ്രീരാമഭഗവാന്‍റെ പ്രസാദമായി രാജ്യത്തെ വിദ്യാലയങ്ങളിലേക്ക് എത്തണമെന്നാണ് ആഗ്രഹിക്കുന്നത്, ഇന്ദുമതി കത്വാരെ പറഞ്ഞു.
ഭാരതീയ വിജ്ഞാനത്തെ തലമുറകളിലേക്ക് പകരുകയാണ് പുനരുത്ഥാന്‍ വിദ്യാപീഠത്തിന്‍റെ ലക്ഷ്യം. ഇന്നത്തെ സാഹചര്യത്തില്‍ ഭാരതീയവിജ്ഞാന ധാര അവതരിപ്പിക്കണമെങ്കില്‍ ധാരാളം സാഹിത്യസൃഷ്ടികളുടെ പിന്‍ബലം ആവശ്യമാണ്. വിദ്യാര്‍ത്ഥികള്‍, അധ്യാപകര്‍, രക്ഷിതാക്കള്‍, പണ്ഡിതന്മാര്‍, ഗവേഷകര്‍ എന്നിവര്‍ക്കായി വിദ്യാപീഠം വിവിധ തരത്തിലുള്ള സാഹിത്യങ്ങള്‍ സൃഷ്ടിച്ചിട്ടുണ്ട്. സ്‌കൂളുകളിലും കോളേജുകളിലും സര്‍വകലാശാലകളിലും ഈ പുസ്തകങ്ങള്‍ ഇടം നേടണം. ദേശീയ വിദ്യാഭ്യാസ നയത്തിന് കീഴിലുള്ള ഇന്ത്യന്‍ നോളജ് വെല്‍ത്ത് ഡിപ്പാര്‍ട്ട്മെന്റുമായി ചേര്‍ന്ന് ഇതിനായുള്ള പരിശ്രമം വിദ്യാപീഠം നടത്തിവരുന്നുണ്ടെന്ന് ഇന്ദുമതി കത്വാരെ കൂട്ടിച്ചേര്‍ത്തു. ധര്‍മ്മവും സംസ്‌കാരവുമായി ബന്ധപ്പെട്ട ഇത്രയേറെ പുസ്തകങ്ങള്‍ ഒരുമിച്ച് പ്രകാശനം ചെയ്യുന്നത് മഹത്തായ കാര്യമാണെന്നും അത് രാജ്യത്തിനും സമൂഹത്തിനും ഗുണം ചെയ്യുമെന്നും വാര്‍ത്താസമ്മേളനത്തില്‍ പങ്കെടുത്ത ആര്‍എസ്എസ് അഖില ഭാരതീയ കാര്യകാരി അംഗം സുരേഷ് ജോഷി പറഞ്ഞു.
ഈ അവസരത്തില്‍, രാംചരിത മനസ് ദേശീയ ഗ്രന്ഥമായി പ്രഖ്യാപിക്കണമെന്ന ആവശ്യത്തില്‍, ഇത് സര്‍ക്കാരിന്റേതാണെന്ന് രാം മന്ദിര്‍ ട്രസ്റ്റ് ജനറല്‍ സെക്രട്ടറി ചമ്പത് റായ് പറഞ്ഞു. എന്നാല്‍ കോടിക്കണക്കിന് ആളുകളുടെ വീടുകളിലും ഹൃദയങ്ങളിലും ആദരിക്കപ്പെടുന്ന ഈ രാജ്യത്തെ പ്രധാന മതഗ്രന്ഥങ്ങളാണ് മനസ്സും ഗീതയും. ഞങ്ങള്‍ എല്ലാവരും ഇതില്‍ പ്രതിജ്ഞാബദ്ധരാണ്. രാം മന്ദിര്‍ ട്രസ്റ്റ് ജനറല്‍ സെക്രട്ടറി ചമ്പത് റായ്‌യും വാര്‍ത്താസമ്മേളനത്തില്‍ പങ്കെടുത്തു.
Discussion about this post