ഗോരഖ്പൂർ: ദീനദയാൽ ഉപാധ്യായ ഗോരഖ്പൂർ സർവ്വകലാശാലയിൽ നടക്കുന്ന 70-ാം എബിവിപി ദേശീയ സമ്മേളനത്തിൽ ഉത്തർപ്രദേശ് മുഖ്യമന്ത്രി യോഗി ആദിത്യനാഥ് പങ്കെടുക്കും. ഇന്ന് നടക്കുന്ന പ്രൊഫ. യശ്വന്ത് റാവു ഖേൽക്കർ പുരസ്കാര സമർപ്പണ ചടങ്ങിൽ മുഖ്യാതിഥിയായി ആണ് അദ്ദേഹം പങ്കെടുക്കുക.
ട്രെയിനിംഗ് ആൻഡ് എഡ്യൂക്കേഷണൽ സെന്റർ ഫോർ ഹിയറിംഗ് എംപയേർഡ് സഹസ്ഥാപകനും ചീഫ് ഓപ്പറേറ്റിങ് ഓഫീസറുമായ ദീപേഷ് നായരാണ് ഈ വർഷത്തെ പുരസ്കാര ജേതാവ്. നൂറുകണക്കിന് ബധിര വിദ്യാർത്ഥികൾക്ക് പുതുജീവിതം നേടിക്കൊടുക്കുന്നതിന് നിർണായകമായ പങ്കുവഹിച്ച മഹത് വ്യക്തിത്വമാണ് പ്രൊഫ. യശ്വന്ത് റാവു ഖേൽക്കർ യുവ പുരസ്കാര ജേതാവ് ദീപേഷ് നായർ.
വെള്ളിയാഴ്ച ആരംഭിച്ച സമ്മേളനത്തിൽ 44 പ്രാന്തങ്ങളിൽ നിന്നുമുള്ള 1500 ഓളം പ്രതിനിധികളാണ് പങ്കെടുക്കുന്നത്. ദേശീയ സമ്മേളന വേദിയിൽ സമകാലിക, സാമൂഹിക, സാംസ്കാരിക, രാഷ്ട്രീയ, വിദ്യാഭ്യാസ വിഷയങ്ങളിൽ സമഗ്രമായ ചർച്ചകളാണ് വിദ്യാർത്ഥികളും അദ്ധ്യാപകരും അടങ്ങുന്ന പ്രതിനിധികളുടെ നേതൃത്വത്തിൽ നടക്കുന്നത്. സോഹോ കോർപ്പറേഷൻ സ്ഥാപകൻ ശ്രീധർ വെമ്പു വെള്ളിയാഴ്ചയാണ് ദേശീയ സമ്മേളനം ഉദ്ഘാടനം ചെയ്തത്.
