ന്യൂദൽഹി: ക്ഷേത്രങ്ങളെ സർക്കാർ നിയന്ത്രണത്തിൽ നിന്ന് മോചിപ്പിക്കുന്നതിനായി വിശ്വഹിന്ദു പരിഷത്ത് രാജ്യവ്യാപക പൊതുജന ബോധവത്കരണ കാമ്പയിൻ പ്രഖ്യാപിച്ചു. ഹിന്ദു സമൂഹത്തോട് വിവേചനം തുടരുന്ന പശ്ചാത്തലത്തിൽ ക്ഷേത്രങ്ങളുടെ നിയന്ത്രണം, ഭരണം, ദൈനംദിന പ്രവർത്തനങ്ങൾ എന്നിവയിൽ നിന്ന് എല്ലാ സംസ്ഥാന സർക്കാരുകളും മാറിനിൽക്കണമെന്ന് വി എച്ച് പി സംഘടനാ ജനറൽ സെക്രട്ടറി മിലിന്ദ് പരാണ്ഡെ വാർത്താസമ്മേളനത്തിൽ പറഞ്ഞു.
സംന്യാസിമാരുടെയും ഹിന്ദു സമൂഹത്തിലെ പ്രമുഖരുടെയും നേതൃത്വത്തിൽ ജനുവരി 5 മുതലാണ് പൊതുജന ബോധവൽക്കരണ കാമ്പയിൻ ആരംഭിക്കുന്നത്. ആന്ധ്രാപ്രദേശിലെ വിജയവാഡയിൽ ഹിന്ദു ശംഖാരവം എന്ന മഹാ സമ്മേളനത്തോടെ പ്രചാരണത്തിന് തുടക്കമാകും.
സ്വാതന്ത്ര്യലബ്ധിയോടെ അവസാനിക്കേണ്ടിയിരുന്ന ഹിന്ദു വിരുദ്ധ നീക്കങ്ങൾ ഇപ്പോഴും തുടരുകയാണ്. ക്ഷേത്രങ്ങൾ ഹിന്ദു സമൂഹത്തിന് ഇനിയും കൈമാറിയിട്ടില്ല. ഭരണഘടനയുടെ 12-ാം അനുച്ഛേദമാണ് ഇതു വഴി ലംഘിച്ചതെന്ന് മിലിന്ദ് പരാണ്ഡെ പറഞ്ഞു. പല ഹൈക്കോടതികളും സുപ്രീം കോടതിയും വ്യക്തമായ സൂചനകൾ നൽകിയിട്ടും സർക്കാരുകൾ ക്ഷേത്രങ്ങളുടെ നടത്തിപ്പും സ്വത്തുക്കളും ഏറ്റെടുക്കുന്നത് തുടരുകയാണ്.
ക്ഷേത്ര നടത്തിപ്പും നിയന്ത്രണവും ഹിന്ദു സമൂഹത്തിന് കൈമാറണം. ഇക്കാര്യത്തിൽ നടപടികൾ മുന്നോട്ടു കൊണ്ടുപോകുന്നതിന് സുപ്രീം കോടതിയിലെ പ്രമുഖ അഭിഭാഷകർ, വിരമിച്ച ഹൈക്കോടതി ചീഫ് ജസ്റ്റിസുമാർ, സംന്യാസിമാർ, വിശ്വഹിന്ദു പരിഷത്ത് ഭാരവാഹികൾ എന്നിവരടങ്ങുന്ന സമിതി രൂപീകരിച്ചു. ക്ഷേത്രങ്ങളുടെ നടത്തിപ്പുമായി ബന്ധപ്പെട്ട ഒരു കരട് തയാറാക്കിയതായും അദ്ദേഹം പറഞ്ഞു.
സർക്കാരുകൾ ക്ഷേത്രം ഹിന്ദുക്കൾക്ക് തിരികെ നൽകുമ്പോൾ സ്വീകരിക്കേണ്ട നടപടിക്രമങ്ങൾക്ക് ഈ സമിതി രൂപം നല്കിയിട്ടുണ്ട്. ആചാര്യന്മാരും പണ്ഡിതരും വിരമിച്ച ജസ്റ്റിസുമാരും അടങ്ങുന്ന സംസ്ഥാന തല ധർമ്മ പരിഷത്തുകൾ രൂപീകരിക്കും. ഇതിൻ്റെ തുടർച്ചയായി ജില്ലാ പരിഷത്തുകളും ക്ഷേത്ര സമിതികളും രൂപീകരിക്കും. ഹിന്ദു സമൂഹത്തിലെ എല്ലാ വിഭാഗം പ്രതിനിധികളെയും ഈ സംവിധാനങ്ങളിൽ ഉൾപ്പെടുത്തും.
തിരുപ്പതി ദേവസ്ഥാനത്തിൻ്റെ പശ്ചാത്തലത്തിൽ ഈ പദ്ധതി രേഖ ആന്ധ്രപ്രദേശ് മുഖ്യമന്ത്രി ചന്ദ്രബാബു നായിഡുവിന് കഴിഞ്ഞ ദിവസം കൈമാറി. മറ്റ് സംസ്ഥാന സർക്കാരുകളുമായും വിവിധ രാഷ്ട്രീയ പാർട്ടികളുമായും സമാനമായ ചർച്ചകൾ നടക്കുന്നുണ്ട്, മിലിന്ദ് പരാണ്ഡെ പറഞ്ഞു.
ക്ഷേത്ര വിമോചനം ആവശ്യപ്പെട്ട് സപ്തംബർ 30ന് വിഎച്ച്‌പി രാജ്യത്തെ എല്ലാ ഗവർണർമാർക്കും നിവേദനം സമർപ്പിച്ചിരുന്നു. :
ക്ഷേത്രങ്ങളിലും എൻഡോവ്‌മെൻ്റ് വകുപ്പുകളിലും നിയമിക്കപ്പെട്ട എല്ലാ അഹിന്ദുക്കളെയും പിരിച്ചുവിടണമെന്ന് നിവേദനം ആവശ്യപ്പെടുന്നു. ആരാധനയിലും ഈശ്വരനിലും വിശ്വാസമുള്ള ഹിന്ദുക്കളെ മാത്രമേ ജോലിക്ക് എടുക്കാവൂ രാഷ്ട്രീയ പാർട്ടികളുമായി ബന്ധമുള്ള ആളുകളെ ക്ഷേത്ര ട്രസ്റ്റികളിലും ഭരണത്തിലും ഉൾപ്പെടുത്തരുത്.ക്ഷേത്രഭൂമിയിലെ അനധികൃത നിർമാണങ്ങളും നീക്കം ചെയ്യണം. ക്ഷേത്രങ്ങളിലെ വരുമാനം ഹിന്ദു ധർമ്മ പ്രചാരണത്തിനും അതുമായി ബന്ധപ്പെട്ട കാര്യങ്ങൾക്കുമായി ചെലവഴിക്കണം, തുടങ്ങിയ ആവശ്യങ്ങളാണ് നിവേദനത്തിൽ ഉൾക്കൊള്ളിച്ചിട്ടുള്ളത്.
Discussion about this post