തിരുവനന്തപുരം: സാങ്കേതിക സർവകലാശാല (കെടിയു) വൈസ് ചാൻസിലർ ചുമതല ഏറ്റെടുക്കാനെത്തിയ സിസാ തോമസിനെ തടഞ്ഞ് എസ്എഫ്‌ഐ പ്രവർത്തകർ. സർക്കാർ ശുപാർശ തള്ളിയുള്ള ഗവർണറുടെ നിയമനത്തിൽ പ്രതിഷേധിച്ചാണ് പുതിയ വിസിയെ എസ്എഫ്‌ഐക്കാർ തടഞ്ഞത്. സർവകലാശാലയിലെ ജീവനക്കാരും സിസയെ തടഞ്ഞു.
ഡോ. എംഎസ് രാജശ്രീയെ സുപ്രീം കോടതി പുറത്താക്കിയ സാഹചര്യത്തിലാണ് വൈസ് ചാൻസലറുടെ ചുമതല സിസയ്‌ക്ക് നൽകിയത്. സാങ്കേതിക വിദ്യാഭ്യാസ വകുപ്പ് സീനീയർ ജോയിന്റ് ഡയറക്ടറാണ് ഡോ. സിസ. കഴിഞ്ഞ ദിവസമായിരുന്നു ഗവർണർ ആരിഫ് മുഹമ്മദ് ഖാൻ കെടിയു വിസിയുടെ അധിക ചുമതല സിസയ്‌ക്ക് നൽകി ഉത്തരവിറക്കിയത്. തുടർന്ന് ഇന്ന് ചുമതലയേറ്റെടുക്കാനെത്തിയപ്പോഴായിരുന്നു എസ്എഫ്‌ഐയുടെ പ്രതിഷേധം.
എംഎസ് രാജശ്രീയെ സുപ്രീം കോടതി പുറത്താക്കിയപ്പോൾ പകരം സംവിധാനം ഉണ്ടാകുന്നതുവരെ കെടിയു വിസി ചുമതല ഉന്നത വിദ്യാഭ്യാസ സെക്രട്ടറിക്ക് നൽകണമെന്നായിരുന്നു സർക്കാരിന്‍റെ നിർദേശം. എന്നാൽ ഈ നിർദേശം ഗവർണർ തള്ളുകയായിരുന്നു. അതേ സമയം ഇത്തരത്തിലുള്ള പ്രതിഷേധം നേരത്തെ പ്രതീക്ഷിച്ചതാണെന്ന് സിസാ തോമസ് പ്രതികരിച്ചു. പുതിയ വിസി ഉണ്ടാകുന്നത് വരെ അധിക ചുമതല നിർവഹിക്കുമെന്നും അവർ വ്യക്തമാക്കി.
Discussion about this post