കൊച്ചി: ക്രിസ്മസ്, പുതുവത്സരാഘോഷങ്ങൾ പടിവാതിൽക്കലെത്തി നിൽക്കെ കൊച്ചിയിലേക്ക് മാരകലഹരി മരുന്നായ എംഡിഎംഎ ഒഴുകുന്നു. ഇന്നലെ കൊച്ചിയിലും മട്ടാഞ്ചേരിയിലുമായി എംഡിഎംഎയുമായി നാലു പേർ അറസ്റ്റിലായി.
ഇടുക്കി ആനച്ചാൽ വെല്ലിയംകുന്നേൽ ഹൗസിൽ അഭിരാം (20), വെള്ളയം തൻറടിയിൽ ഹൗസിൽ അബിൻ (18), അടിമാലി പാറയിൽ ഹൗസിൽ അനുലക്ഷ്മി (18) എന്നിവരാണ് എറണാകുളം നോർത്ത് (കസബ) പൊലീസിന്‍റെ പിടിയിലായത്. കലൂർ ആസാദ്റോഡ് ലിബർട്ടി ലൈനിന് സമീപത്തെ വീട്ടിൽ നിന്നുമാണ് മൂന്നു പേരെയും കസ്റ്റഡിയിലെടുത്തത്. ഇവരിൽ നിന്നു 122 ഗ്രാം എംഡിഎംഎ പിടിച്ചെടുത്തു.
പള്ളുരുത്തി സ്വദേശി റസൂൽ(40)നെയാണ് മട്ടാഞ്ചേരി എസ്ഐഎ ആർ രൂപേഷിന്‍റെ നേതൃത്വത്തിൽ അറസ്റ്റ് ചെയ്തത്.കരിപ്പാലം മൈതാനത്തിന് സമീപം പുലർച്ചെയാണ് ഇയാൾ പിടിയിലായത്.ഇയാളിൽ നിന്ന് 1.25 ഗ്രാം എംഡിഎംഎ കണ്ടെടുത്തു. എസ്എമാരായ അലക്സ്,മുകുന്ദൻ സീനിയർ സിവിൽ പൊലിസ് ഓഫിസർമാരായ എഡ്വിൻ റോസ്,വിജു,രഞ്ജിത്ത് ഹാനി,സിവിൽ പൊലിസ് ഓഫിസർ ബിജു എന്നിവരും സംഘത്തിലുണ്ടായിരുന്നു.ഇയാൾ പശ്ചിമ കൊച്ചി കേന്ദ്രീകരിച്ചുള്ള ലഹരി മാഫിയയിലെ കണ്ണിയാണെന്നും ലഹരിയുടെ ഉറവിടം സംബന്ധിച്ച് കൂടുതൽ അന്വേഷണം നടത്തുമെന്നും എസ്ഐ രൂപേഷ് പറഞ്ഞു.
