തിരുവനന്തപുരം: വിദ്യാഭ്യാസ മേഖലയിലെ മൂല്യച്യുതി പരിഹരിക്കാന് സര്ക്കാര് ക്രിയാത്മകമായി ഇടപെടണമെന്ന് എബിവിപി സംസ്ഥാന സമ്മേളനം പ്രമേയത്തിലൂടെ ആവശ്യപ്പെട്ടു. സംസ്ഥാന സെക്രട്ടറി എന്.സി.ടി. ശ്രീഹരി പ്രമേയം അവതരിപ്പിച്ചു. ജോയിന്റ് സെക്രട്ടറി എന്.വി.അരുണ് അവതരിപ്പിച്ച പൊതു പ്രമേയത്തിലൂടെ വികസന വിരുദ്ധ നിലപാടില് നിന്നും തീവ്രവാദ സംഘടനകളോടുള്ള മൃദു സമീപനത്തില് നിന്നും ഇടത് സര്ക്കാര് പിന്മാറണമെന്നും ദേശീയ നിര്വാഹക സമിതിഅംഗം ഗ്രീഷ്മ എം തമ്പി അവതരിപ്പിച്ച പ്രമേയത്തിലൂടെ സ്വാശ്രയഭാരതം നിര്മ്മിക്കാന് കേരളസമൂഹം മുന്നിട്ട് ഇറങ്ങണമെന്നും ആവശ്യപ്പെട്ടു.
വരും വര്ഷങ്ങളില് ഗുണപരവും സംഖ്യാത്മകവുമായ മാറ്റം കൊണ്ടുവരുവാന് പുതിയ ദേശീയ വിദ്യാഭ്യാസ നയത്തിന് സാധിക്കുമെന്ന് മുന് കേരള കേന്ദ്ര സര്വ്വകളാശാല വി.സി.ഡോ ജി. ഗോപകുമാര് സമ്മേളനത്തിന്റെ ഭാഗമായി നടന്ന സംവാദത്തില് സംസാരിക്കവെ ചൂണ്ടിക്കാട്ടി. സംസ്ഥാനത്തിന്റെ ഡെമോഗ്രാഫിക് ഡിവിഡന്റ് ശരിയായ രീതിയില് ഉപയോഗിക്കുകയാണെങ്കില് രാഷ്ട്ര വികസനത്തിന് മുതല്ക്കൂട്ടാകും. അക്രമം, മയക്കുമരുന്ന് ഉപയോഗം മുതലായവ ഒഴിവാക്കി സമൂഹത്തിലെ മൂല്യശോഷണം അവസാനിപ്പിക്കാന് വിദ്യാര്ത്ഥി സംഘടനകള് മുന്നിട്ടിറങ്ങണമെന്നും അദ്ദേഹം പറഞ്ഞു. ചില അധ്യാപകരും ചെറിയ വിഭാഗം വിദ്യാര്ത്ഥികളും അടങ്ങുന്ന നിക്ഷിപ്ത താത്പര്യക്കാരുടെ സംഘവുമാണ് കേരളത്തിലെ കലാലയങ്ങളില് നിന്ന് ഗുണമേന്മയുള്ള വിദ്യാഭ്യാസത്തെ അകറ്റിനിര്ത്തുന്നത് എന്ന് സേവ് യൂണിവേഴ്സിറ്റി കാമ്പയിന് ചെയര്മാന് ആര്.എസ്.ശശികുമാര് പറഞ്ഞു. സ്വകാര്യ എയിഡഡ് മേഖലയിലെ നിയമനങ്ങള്ക്ക് കോഴ വാങ്ങുന്ന സമ്പ്രദായം ഇപ്പോഴും കേരളത്തില് നിലനില്ക്കുന്നുവെന്ന് ഡോ റഷീദ് പാനൂര് അഭിപ്രായപ്പെട്ടു.
Discussion about this post