സംസ്ഥാനത്ത് കൊറോണ കേസുകൾ വർദ്ധിക്കുന്നു; പുതിയ മാർഗ നിർദ്ദേശങ്ങൾ മുന്നോട്ടുവെച്ച് ആരോഗ്യ വകുപ്പ്

തിരുവനന്തപുരം: സംസ്ഥാനത്തെ കൊറോണ പ്രതിരോധത്തിന് ആരോഗ്യവകുപ്പ് മാർഗ നിർദ്ധേശങ്ങൾ പുറപ്പെടുവിച്ചു. ജീവിതശൈലി രോഗമുള്ളവർ, കുട്ടികൾ, ഗർഭിണികൾ, പ്രായയമായവരും മാസ്‌ക് നിർബന്ധമാക്കണം. സംസ്ഥാനത്തെ ആശുപത്രികളിൽ കൊറോണ രോഗികൾക്ക് ചികിത്സ നിഷേധിക്കരുതെന്നും ആരോഗ്യമന്ത്രി നിർദ്ദേശിച്ചു.

സംസ്ഥാനത്ത് കൊറോണ കേസുകൾ കൂടുന്ന സാഹചര്യം കണക്കിലെടുത്ത് പ്രതിരോധ പ്രവർത്തനങ്ങൾ ശക്തിപ്പെടുത്താനും നിർദ്ദേശമുണ്ട്. കഴിഞ്ഞ ദിവസം ചേർന്ന അവലോകന യോഗത്തിലാണ് തീരുമാനം. കൊറോണ കേസുകളിലെ വർദ്ധനവിന്‍റെ കാരണം വിലയിരുത്താനും നിർദ്ദേശമുണ്ട്. സർക്കാർ, സ്വകാര്യ ആശുപത്രികളിലും കൊറോണ രോഗികളെ പരിശോധിക്കാൻ പ്രത്യേകം കിടക്കകൾ സജ്ജമാക്കണം.

മറ്റു രോഗങ്ങളിൽ ചികിത്സയിൽ കഴിയുന്ന രോഗികൾക്ക് കൊറോണ സ്ഥിരീകരിച്ചാൽ ചികിത്സ നിഷേധിക്കാതെ അതേ ആശുപത്രിയിൽ തന്നെ ചികിത്സ ഉറപ്പ് വരുത്തണം. പോസിറ്റീവ് ആകുന്നവരുടെ സാമ്പിളുകൾ നിലവിലുള്ള മാനദണ്ഡങ്ങളനുസരിച്ച് പരിശോധനയ്‌ക്ക് അയക്കണം.

ജില്ലാ സർവയലൻസ് ഓഫീസർമാർ ഇക്കാര്യം ഉറപ്പ് വരുത്തണമെന്ന് ആരോഗ്യ മന്ത്രി വീണ ജോർജ് കൂട്ടിച്ചേർത്തു. ആരോഗ്യ പ്രവർത്തകരും ആശുപത്രിയിൽ എത്തുന്ന രോഗികളും കൂട്ടിരിപ്പുകാരും നിർബന്ധമായും മാസ്‌ക് ധരിക്കണം. സർക്കാർ – സ്വകാര്യ ആശുപത്രികളിൽ കൊറോണ ചികിത്സാ സംവിധാനം ഒരുക്കണം. ചികിത്സ ലഭ്യമാകുന്നുണ്ടെന്ന് ജില്ലാ മെഡിക്കൽ ഓഫീസർമാർ ഉറപ്പ് വരുത്തണമെന്നും മാർഗനിർദ്ദേശത്തിൽ പറയുന്നുണ്ട്.