പുനലൂര്‍: സിപിഎം നഗരസഭാ കൗണ്‍സിലര്‍ അരവിന്ദാക്ഷന്‍ കുത്തിക്കൊലപ്പെടുത്തിയ ബിജെപി പുനലൂര്‍ ഏരിയ കമ്മറ്റി അംഗം കക്കോട് സന്തോഷ് ഭവനില്‍ എസ്. സുമേഷിന് ജന്മനാടിന്‍റെ അന്ത്യാഞ്ജലി. പുനലൂര്‍ താലൂക്ക് ആശുപത്രി മോര്‍ച്ചറിയില്‍ സൂക്ഷിച്ചിരുന്ന ഭൗതികദേഹം ഇന്നലെ രാവിലെ 8.30ന് ബിജെപി നേതാക്കള്‍ ഏറ്റുവാങ്ങി.
തുടര്‍ന്ന് നൂറുകണക്കിന് വാഹനങ്ങളുടെ അകമ്പടിയില്‍ വിലാപയാത്രയായി സുമേഷിന്റെ വീട്ടില്‍ എത്തിച്ചു. സഹപ്രവര്‍ത്തകനെ അവസാനമായി ഒരുനോക്കു കാണുവാന്‍ വന്‍ ജനാവലിയാണ് കക്കോട് സന്തോഷ് ഭവനില്‍ എത്തിയത്.
ഭൗതികദേഹത്തിനരികെ പൊട്ടിക്കരഞ്ഞ അമ്മ രാജമ്മ, ഭാര്യ സീത, മക്കളായ അമല്‍, അമൃത്, സഹോദരി സജിത എന്നിവരെ ആശ്വസിപ്പിക്കാനാകാതെ ബന്ധുക്കള്‍ വിഷമിച്ചു. സമൂഹത്തിന്റെ നാനാതുറകളില്‍ ഉള്ളവര്‍ അന്തിമോപചാരം അര്‍പ്പിക്കാനെത്തി മൃതദേഹം ഉച്ചയ്ക്ക് 11.45ന് ചിതയിലേക്ക് എടുത്തു. മക്കള്‍ അമല്‍, അമൃത് എന്നിവര്‍ ചിതയ്ക്ക് തീ കൊളുത്തി.
ബിജെപി ദേശീയ നിര്‍വാഹകസമിതിയംഗം പി.കെ. കൃഷ്ണദാസ്, സംസ്ഥാന വൈസ് പ്രസിഡന്റുമാരായ പ്രൊഫ. വി.ടി. രമ, സി.ശിവന്‍കുട്ടി, സംസ്ഥാന സെക്രട്ടറി രാജി പ്രസാദ്, ദക്ഷിണമേഖലാ പ്രസിഡന്റ് കെ.സോമന്‍, സെക്രട്ടറി വി.എസ്. ജിതിന്‍ ദേവ്, ജില്ലാ പ്രസിഡന്റ് ബി.ബി. ഗോപകുമാര്‍, സംസ്ഥാന കമ്മറ്റിയംഗം ബി. രാധാമണി, ആര്‍എസ്എസ് പ്രാന്തീയ കാര്യകാരി അംഗം വി. മുരളീധരന്‍, വിഭാഗ് വ്യവസ്ഥാപ്രമുഖ് എസ്. അശോകന്‍, ജില്ലാ കാര്യവാഹ് ആര്‍. സതീഷ് തുടങ്ങിയവര്‍ അന്തിമോപചാരം അര്‍പ്പിക്കാനെത്തിയിരുന്നു.
Discussion about this post