ആലപ്പുഴ: വീടുകളില്‍ വെള്ളം കയറിയതിനെ തുടര്‍ന്ന് ദുരിത ബാധിതരെ സേവാഭാരതി നേതൃത്വത്തില്‍ സുരക്ഷിത സ്ഥലത്തേക്കു മാറ്റി. വെളിയനാട് ബ്ലോക്ക് പഞ്ചായത്ത് പ്രസിഡന്റ് വി.കെ. വേണുഗോപാല്‍, തലവടി പഞ്ചായത്ത് 11-ാം വാര്‍ഡില്‍ കണിയാമ്പറമ്പില്‍ വിജയമ്മ എന്നിവരെയാണ് സേവാ ഭാരതി സഹായത്തോടെ ക്യാമ്പിലേക്ക് മാറ്റിയത്.
വീട്ടില്‍ വെള്ളം കയറിയതിനെ തുടര്‍ന്ന് വി.കെ. വേണുഗോപാല്‍ എടത്വ പോലീസില്‍ അറിയിച്ചിരുന്നു. പോലീസ്, ബ്ലോക്ക് മെമ്പര്‍ അജിത്ത് കുമാര്‍ പിഷാരത്തിനെ അറിയിച്ചു. അജിത്തിന്റെ നേതൃത്വത്തില്‍ സേവാഭാരതിയും സന്നദ്ധ പ്രവര്‍ത്തകരും സംയുക്തമായി വേണുഗോപാലിനെ സുരക്ഷിത സ്ഥലത്തേക്ക് മാറ്റുകയായിരുന്നു.
കിടപ്പുരോഗിയായ വിജയമ്മയെ വീട്ടില്‍ നിന്ന് വള്ളത്തില്‍ കരയ്‌ക്കെത്തിച്ച് തലവടി ഗവ. ഹൈസ്‌കൂളിലെ ക്യാമ്പിലേക്കു മാറ്റി. ശരത്ത്, പ്രമോദ്, സതീശന്‍, അനന്തകൃഷ്ണന്‍, സേവാ ഭാരതിക്കാരായ എം.എസ്. മധുസൂദനന്‍, കെ. ബിജു, ഗോകുല്‍, ബിനീഷ്, അനന്തു, രാഖില്‍ രാജ്, കാര്‍ത്തിക്, മുട്ടാര്‍ ഗ്രാമ പഞ്ചായത്ത് അംഗം എം.ഒ. ലതീഷ്‌കുമാര്‍ എന്നിവര്‍ സന്നദ്ധ പ്രവര്‍ത്തനങ്ങള്‍ക്ക് നേതൃത്വം വഹിച്ചു.
Discussion about this post