കോട്ടയം: കൂട്ടിക്കല് പഞ്ചായത്തില് ഉണ്ടായ പ്രകൃതി ക്ഷോഭത്തിലും ഉരുള്പൊട്ടലിലും വീട് നഷ്പ്പെട്ടവര്ക്കായി സേവാഭാരതി നിര്മിച്ചു നല്കുന്ന സ്നേഹനികുഞ്ജത്തില് 12 വീടുകള്.
സ്വന്തമായി സ്ഥലമുണ്ടായിരുന്ന നാല് പേര്ക്ക് നേരത്തെ വീടുകള് നിര്മിച്ചു നല്കി. ശേഷിക്കുന്ന എട്ടു കുടുംബങ്ങള്ക്ക് 54 സെന്റ് ഭൂമി വാങ്ങിയാണ് വീടുകള് നിര്മിച്ചിതെന്ന് സേവാഭാരതി ഭാരവാഹികള് പത്രസമ്മേളനത്തില് അറിയിച്ചു. അഞ്ചു സെന്റ് സ്ഥലം. ഒരു വീടിന് 9.5 ലക്ഷം രൂപയാണ് ചെലവ്. ഓരോ വീടിനും സിറ്റൗട്ട്, ഹാള്, രണ്ടു കിടപ്പു മുറികള്, അടുക്കള എന്നിവയുണ്ട്. രണ്ട് മുറികളും ബാത്ത് അറ്റാച്ച്ഡ് ആണ്. കൂടാതെ വീടിനു പുറത്തും ഒരു ശുചിമുറിയുണ്ട്.
തിങ്കളാഴ്ച കൊടുങ്ങ സുബ്രഹ്മണ്യസ്വാമി ക്ഷേത്ര മൈതാനി യില് ചേരുന്ന ചടങ്ങിലാണ് ഗവര്ണര് താക്കോലുകള് കൈമാറുന്നത്.
ചടങ്ങില് സേവാഭാരതി കോട്ടയം ജില്ലാ പ്രസിഡന്റ് അഡ്വ. രശ്മി ശരത് അധ്യക്ഷയാകും. ആര്എസ് എസ് ദക്ഷിണ കേരള പ്രാന്തപ്രചാരക് എസ് സുദര്ശന് സേവാ സന്ദേശം നല്കും. വാഴൂര് തീര്ത്ഥപാദാശ്രമത്തിലെ സ്വാമി ഗരുഡധ്വജാനന്ദ തീര്ത്ഥപാദര് പങ്കെടുക്കും. കോട്ടയം ജില്ലാ പഞ്ചായത്ത് അംഗം അഡ്വ. ഷോണ് ജോര്ജ്ജ്, ദേശീയ സേവാഭാരതി സംസ്ഥാന പ്രസിഡന്റ് ഡോ. രഞ്ജിത് വിജയഹരി, ജില്ലാ ജനറല് സെക്രട്ടറി കെ.ജി. രാജേഷ് എന്നിവര് പ്രസംഗിക്കും.
പത്രസമ്മേളനത്തില് സേവാഭാരതി സംസ്ഥാന വൈസ് പ്രസിഡന്റ് ഡോ. ഇ. പി കൃഷ്ണന് നമ്പൂതിരി, ജില്ലാ പ്രസിഡന്റ് അഡ്വ. രശ്മി ശരത്, ജനറല് സെക്രട്ടറി കെ.ജി. രാജേഷ് എന്നിവര് പങ്കെടുത്തു.
Discussion about this post